ԵՐԵՎԱՆ, 11 մայիսի. /Նովոստի-Արմենիա/. Sukhoi Superjet 100 քաղաքացիական առաջին ինքնաթիռը կվաճառվի հայկական «Արմավիա» ընկերությանը, երկուշաբթի լրագրողներին տեղեկացրել է «Սուխոյի քաղաքացիական ինքնաթիռներ» (ՍՔԻ, ինքնաթիռը մշակող ընկերություն) ընկերության հասարակայնության հետ կապերի հարցերով տնօրեն Օլգա Կայուկովան, հաղորդում է «ՌԻԱ Նովոստին»։
Կայուկովան նշել է, որ այդ մոդելն արդեն հավաքման վերջին փուլում է գտնվում և շուտով կհանձնվի պատվիրատուին՝ «Արմավիա» ավիաընկերությանը։
Նրա խոսքերով՝ հայկական ընկերությունն ընտրվել է պատվիրված ինքնաթիռի կոնֆիգուրացիայի պարզության պատճառով։
«Ընտրությունը կախված է մի շարք գործոններից։ Կոնֆիգուրացիան որոշում է պատվիրատուն։ Որքան պարզ է կոնֆիգուրացիան, այնքան հեշտ է պատրաստել ինքնաթիռը», - ավելացրել է նա։
Կայուկովան տեղեկացրել է, որ ըստ կատալոգի՝ Superjet 100 տեսակի ինքնաթիռի գինը կազմում է 28 միլիոն դոլար, սակայն ամեն կոնկրետ դեպքում պատվերի արժեքի վերաբերյալ ձեռք է բերվում առանձին պայմանավորվածություն։ «Վճարումն իրականացվում է կանխավճարային սկզբունքով», - պարզաբանել է ընկերության ներկայացուցիչը։
Կայուկովայի խոսքերով՝ այսօրվա դրությամբ ընդհանուր առմամբ պատվիրվել է Superjet 100 տեսակի 98 ինքնաթիռ։ Դրանցից երեսունը բաժին է ընկնում «Աէրոֆլոտ» ընկերությանը, տասը պատվեր են կատարել իտալական ընկերությունները։ «Որոշ կանխավճարներ արդեն արվել են», - նշել է նա։
Ինչպես լրագրողների հետ զրույցի ժամանակ ընդգծել է «Սուխոյ» ընկերության գլխավոր տնօրեն Միխայիլ Պողոսյանը, գոյություն ունի ինքնաթիռների արտադրության ֆինանսավորման խնդիր, «և մենք չենք լուծի այն առանց կառավարության աջակցության»։
Նրա խոսքերով՝ ճգնաժամի պայմաններում «ավիաընկերությունը չունի անհրաժեշտ ֆինանսական կայունություն ինքնաթիռների արտադրության գործում միջոցներ ներդնելու համար»։
Առաջին Sukhoi Superjet 100 ինքնաթիռը հանրությանը ներկայացվել է 2007թ. սեպտեմբերի 26-ին՝ Ամուրի Կոմսոմոլսկի գործարանում: Հենց այնտեղ էլ հաջողությամբ իրականացվել է առաջին թռիչքը:
Sukhoi Superjet 100 տեսակի ինքնաթիռների արտադրությունը ՌԴ կառավարության կողմից հավանության արժանացած հեռանկարային նախագիծ է ռուսական ինքնաթիռաշինության գործում։ Դրանք վառելիքի արդյունավետության, բնապահպանական բնութագրերորով, ուղևորների համար հարմարավետության տեսակետից համապատասխանում են քաղաքացիական ավիացիայի ինքնաթիռների ռուսական և համաշխարհային շուկայի ժամանակակից և հեռանկարային պահանջներին։ Այդ օդանավերի արտադրողը «Սուխոյ քաղաքացիական ինքնաթիռներ» (ՍՔԻ) ՓԲԸ-ն է, որը «Սուխոյ» ընկերության» դուստր ձեռնարկությունն է։ --0—
