ԵՐԵՎԱՆ, 8 մայիսի. /Նովոստի-Արմենիա/. Հայաստանում կայուն է համաճարակաբանական ընդհանուր իրավիճակը, ուրբաթ լրագրողներին հայտնեց ՀՀ առողջապահության հիգիենիկ և հակահամաճարակաբանական տեսչության պետ Արտավազդ Վանյանը։
«Եղանակն աստիճանաբար տաքանում է և այդ կապակցությամբ ավելի մեծ ուշադրություն է դարձվում աղիքային վարակներին, քանի որ մարմնի ջերմաստիճանի բարձրացման հետ բարենպաստ պայմաններ են ստեղծվում վարակի հարուցիչների ակտիվացման համար»,- ասաց Վանյանը։
Նա նշեց, որ ուշադրության կենտրոնում է նաև օդակաթիլային ճանապարհով փոխանցվող հիվանդությունների, օրինակ, А/H1N1 գրիպի նկատմամբ վերահսկողությունը։ Վանյանը հավաստիացրեց, որ ներկայում ձեռնարկվում են բոլոր անհրաժեշտ միջոցները վարակի՝ Հայաստան ներթափանցելը կկանխելու համար։
Բացի այդ, նրա խոսքով, քայլեր են ձեռնարկվում նաև սովորական գրիպի տարածումը կանխելու ուղղությամբ։ Միաժամանակ Վանյանը ուշադրություն դարձրեց այն հանգամանքին, որ Հայաստանում հաճախ շփոթում են գրիպն ու հարբուխը, մինչդեռ դրանք բոլորովին տարբեր հիվանդություններ են։
«Վերջին մի քանի տարիների արդյունքներով մեզ մոտ չի նկատվում գրիպով հիվանդացության դեպքերի կտրուկ աճ։ Հիվանդության դեմ պայքարում մենք իրականացնում ենք մի շարք կանխարգելիչ միջոցառումներ, օրինակ, պատվաստումներ ենք իրականացնում ռիսկի հիմնական խմբերի շրջանում՝ դպրոցներում, մանկապարտեզներում և բուհերում»,- նշեց նա։
Վանյանի բերած տվյալներով, Հայաստանում ամեն տարի իրականացվում է 25 հազար պատվաստում, ինչը հանգեցրել է կարմրուկ և կարմրախտ հիվանդությունների գրեթե լրիվ վերացմանը։ -0-
