ԵՐԵՎԱՆ, 8 մայիսի. /Նովոստի-Արմենիա/. ՀՀ առողջապահության նախարարությունը հիշեցնում է, որ А/H1N1 գրիպի վիրուսը ենթարկվում է բուժման և խորհուրդ չի տալիս հիվանդությունը «խոզի գրիպ» անվանել: Ինչպես ուրբաթ լրագրողներին հայտնեց ՀՀ առողջապահության փոխնախարար Հայկ Դարբինյանը, А/H1N1 գիրպի վիրուսի բուժման ժամանակ գործածվում են նույն մեթոդներն, ինչ որ սովորական գրիպի դեպքում։
«Մենք գիտենք, թե ինչպես պաշտպանվել А/H1N1 գրիպից։ Հիվանդությունը ենթարկվում է բուժման, իսկ դրա հաջողությունը կախված է նրանից, թե որ փուլում է հայտնաբերվել վարակը։ Գոյություն ունի դեղամիջոց թռչնագրիպի դեմ ՝ «Տամիֆլյու», որն արդեն կարելի է օգտագործել նաև А/H1N1 բուժման դեպքում»,- նշեց նա։
ԱՀԿ տվյալներով, մայիսի 7-ի դրությամբ աշխարհի 24 երկրում արձանագրվել է А/H1N1 գրիպով հիվանդացության ավելի քան երկու հազար դեպք։ Հիվանդացության դեպքեր գրանցվել են, մասնավորապես, ԱՄՆ-ում, Մեքսիկայում, Իսպանիայում, Մեծ Բրիտանիայում, Գերմանիայում, Ֆրանսիայում, Ավստրիայում, Շվեյցարիայում, Նոր Զելանդիայում, Չինաստանում, Կորեայում։
Հայաստանում А/H1N1 հիվանդացության դեպքեր չեն արձանագրվել։ Դարբինյանի կարծիքով, հիվանդացությունների վիճակագրությունը ցույց է տալիս, որ А/H1N1 վիրուսը ենթարկվում է բուժման, և դրա դեմ պայքարում պետք է հատուկ ուշադրություն դարձնել նաև հիվանդության հետևանքների, մասնավորապես, հազի և թոքաբորբի բուժմանը։
Իր հերթին, ՀՀ առողջապահության հիգիենիկ և հակահամաճարակային տեսչության պետ Արտավազդ Վանյանը հիշեցրեց, որ այսպես կոչված «խոզի գրիպը» նոր հիվանդություն չէ, և հիվանդացության դեպքեր արձանագրվել են դեռ անցած դարի 30-ական թվականներից։ Ինչպես ընդգծեց Վանյանը, այս վարակն անվանել «խոզի գրիպ» ճիշտ չէ, քանի որ այն վերափոխվել է և սկսել է փոխանցվել մարդուց մարդուն։
Վանյանը հատուկ նշեց, որ միս օգտագործելով հնարավոր չէ վարակվել А/H1N1 վիրուսով, քանի որ ճիշտ մշակում անցած միսը վտանգ չի ներկայացնում մարդու համար և լիովին անվտանգ է։ -0-
