Հայկական «Սահման» ֆիլմը միջազգային միանգամից երկու հեղինակավոր կինոփառատոների հաղթողն է դարձել, ուրբաթ մամուլի ասուլիսի ժամանակ ասաց ֆիլմի ռեժիսոր Հարություն Խաչատրյանը:
«Ապրիլի 17-26-ը Հյուսթոնի 42-րդ համաշխարհային կինոփառատոնում ֆիլմը պլատինե մրացանակակիր է դարձել՝ որպես լավագույն խաղարկային ֆիլմ, իսկ ապրիլի 24-ից մայիսի 3-ը Սիրակուզայի միջազգայի կինոփառատոնում հաղթել է «Լավագույն լիամետրաժ վավերագրական ֆիլմ» անվանկարգում»,- ասաց նա:
Խաչատրյանի խոսքով, երկու փառատոներում էլ չափազանց մեծ մրցակցություն է եղել, անվանակարգերում հավակնել են ֆիլմեր Չինաստանից, Լեհաստանից և Ադրբեջանից, սակայն լավագույնն է ճանաչվել հայկական ֆիլմը:
«Սահմանը» ֆիլմը պոետիկ դրամա է հայ-ադրբեջանական սահմանը հատող գոմեշի մասին: Վերջինը ֆիլմի գլխավոր հերոսն է, որի օգնությամբ վեր են հանվում 2 հարևան ժողովուդների միջև գոյություն ունեցող բարդ հիմնախնդիրները, սահմանամերձ գյուղի կենցաղը, մարդկանց կրոնական ու մշակութային առօրյան: Գոմեշի պատմությունն իրական է, Հարություն Խաչատրյանն անձամբ դրա ակնատեսն է եղել: Այժմ կինոյի լեզվով վերաշարադրելով այդ պատմությունը` նա փորձել է առանձին կերպարների օգնությամբ ցույց տալ պատերազմի իրական դեմքը: Ֆիլմի միջոցով ռեժիսորն առաջարկում է քանդել գոյություն ունեցող բոլոր սահմանները:-0-
