Հաստատվել է Երևանի քաղաքապետի առաջին երդման արարողության կարգը
ՀՀ կառավարությունը հինգշաբթի նիստում հաստատել է Երևանի քաղաքապետի առաջին երդման արարողության և մայրաքաղաքի Ավագանու խորհրդի առաջին նիստի անցկացման կարգը։
Ինչպես հայտարարեց ՀՀ տարածքային կառավարման փոխնախարար Վաչե Տերտերյանը, նման որոշումներն ընդունվում են «Երևան քաղաքում տեղական ինքնակառավարման մասին» նոր օրենքին համապատասխան, իսկ երկրի կառավարությունը կարգավորում է տվյալ հարցերն առաջին անգամ։
Համաձայն կառավարության որոշման՝ Երևանի քաղաքապետի առաջին երդմնակալության արարողությունը պետք է կատարվի քաղաքապետի ընտրությունների երրորդ օրը՝ Ավագանու խորհրդի նիստի ընթացքում։ Ստանձնելով պաշտոնը՝ Երևանի քաղաքապետը երդվում է պահպանել Սահմանադրությունը, օրենքները, Ավագանու խորհրդի որոշումները, ազնվորեն և բարեխղճորեն կատարել Երևանի քաղաքապետի լիազորությունները, ծառայել Երևանի բարգավաճմանը, գործել ի բարօրություն քաղաքի բնակիչների։
«Պարտավորվում եմ հոգ տանել մեր հնագույն մայրաքաղաքի փառքի պահպանության և բազմապատկման համար, պահպանել համայնքների օրինական շահերն ու սեփականությունները, ուժերիս անմնացորդ նվիրումով սատարել ժողովրդի հավատին, նպաստել նրա նյութական և հոգևոր վերելքին»,- ասվում է քաղաքապետի երդման մեջ։ -0-
