Հայաստանի ԱԺ խոսնակը փախստականների խնդիրներ է քննարկել ԵԽԽՎ ներկայացուցչի հետ

Հայաստանի Ազգային ժողովի նախագահ Հովիկ Աբրահամյանը տեղահանված անձանց խնդիրներն է երեքշաբթի քննարկել  Եվրոպայի Խորհրդի Խորհրդարանական Վեհաժողովի (ԵԽԽՎ) Միգրացիայի, փախստականների և ազգաբնակչության հարցերով հանձնաժողովի զեկուցող, Մեծ Բրիտանիայի և Հյուսիսային Իռլանդիայի Միացյալ թագավորության խորհրդարանի Համայնքների պալատի պատգամավոր Ջոն Գրինվեյի հետ, «Նովոստի-Արմենիա» գործակալությանը հայտնեցին ՀՀ ԱԺ հասարակայնության հետ կապերի վարչությունից:

Զրույցի ընթացքում Գրինվեյը Հայաստանի խորհրդարանի նախագահին ներկայացրեց Հարավային Կովկաս իր այցի նպատակը, որի շրջանակներում նա ուսումնասիրում է իրավիճակը` «Եվրոպայում երկարաժամկետ տեղահանված անձանց իրավունքների պաշտպանությունը» թեմայով ԵԽԽՎ համապատասխան հանձնաժողովում իր կատարելիք զեկույցի համար:

ԱԺ խոսնակն իր հերթին ընդգծեց, որ Հայաստանի իշխանություններն անընդունելի են համարում տեղահանված անձանց ողբերգության շահագործումն ինչ-ինչ քաղաքական նպատակների հասնելու համար:

Նա ԵԽԽՎ զեկուցողին ներկայացրեց Հայաստանի իշխանությունների ձեռնարկած քայլերը` Հայաստանում բնակություն հաստատած հարյուրհազարավոր փախստականների հոգսերին ու կարիքներին լուծումներ գտնելու համար:

Հանդիպման ընթացքում զրուցակիցները համաձայնեցին, որ առաջնահերթ է լուծել փախստականների մշտական կացարանների խնդիրը` ստեղծելով նրանց համար արժանապատիվ պայմաններ և ենթակառուցվածք, որին կարող է լրջորեն օժանդակել միջազգային հանրությունը:

Զրույցի ընթացքում նաև անդրադարձ կատարվեց Հայաստանի ներքին քաղաքականության և տարածաշրջանի անվտանգության ու կայունության հարցերի լայն շրջանակի:--0--