Հայաստանը 75 զարգացող երկրների թվում 32-րդ տեղն է զբաղեցնում մայրերի համար բարենպաստ պայմանների ցուցանիշով, հայտնեց Save the children հասարակական կազմակերպության հայկական գրասենյակի հասարակայնության հետ կապերի մասնագետ Նարինե Բեզիրղանյանը՝ հղում անելով Save the children կազմակերպության «Աշխարհի մայրերի կեցությունը» 10-րդ ամենամյա զեկույցի տվյալներին։
«Զեկույցի համաձայն՝ Հայաստանը 2009 թ.-ին զբաղեցնում է 32-րդ տեղը՝ 2008 թ.-ի համեմատ հետընթացը հաղթահարելով 7 կետով»,- երեքշաբթի մամուլի ասուլիսի ժամանակ պարզաբանեց Բեզիրղանյանը։
Նրա խոսքերով՝ աշխարհի 158 երկրներից մայրերի համար ամենաբարենպաստ պայմաններ ունեցող երկրների տասնյակում են Շվեդիան, Նորվեգիան, Ավստրալիան, Իսլանդիան, Դանիան, Նոր Զելանդիան, Ֆինլանդիան, Իռլանդիան, Գերմանիան և Նիդեռլանդները։
Բեզիրղանյանը նշեց, որ ամենաքիչ բարենպաստ պայմանները մայրերի համար ստեղծված են Նիգերիայում, Սիերա-Լիոնեում, Չադում, Գվինեա Բիսաուում, Կոնգոյում, Յեմենում, Սուդանում, Անգոլայում, Էրիթրեայում և Ջիբութիում։
Ընդ որում, Բեզիրղանյանի խոսքերով, ցուցակում ընդգրկված 158 երկրներից 43-ը ամենազարգացածներն են, 75-ը՝ զարգացողները և 40-ը՝ հետամնացները։
Նա պարզաբանեց, որ «Մայրության ինդեքսը» հիմնված է մոր և երեխայի բարեկեցության ու առողջության ցուցանիշների վերլուծության վրա։
«Այսպիսով, առաջին 10 երրները շատ բարձր ցուցանիշներ ունեն մայրերի ու երեխաների կրթության, առողջության ու տնտեսական կարգավիճակի առումով, այն դեպքում երբ վերջին 10 երկրներում ամենացածր ցուցանիշներ են նկատվում բոլոր ոլորտներում»,- ասաց նա։
Save the children կազմակերպության հայկական գրասենյակը հիմնվել է 1993 թ.-ին։ Այս ընթացքում իրականացվել են շուրջ 47 մլն. դոլար գումարի վերականգնողական ու զարգացման ծրագրեր, ինչի շնորհիվ օգնություն է ցուցաբերվել Հայաստանի առավել խոցելի երեխաներին ու ընտանիքներին։
Ծրագրերն ընդգրկել են երեխաների պաշտպանության, առողջապահության, կրթության, տնտեսական հնարավորություններ ստեղծելու ոլորտներ։ Save the children կազմակերպությունն անկախ ազգային կազմակերպությունների գլոբալ ցանց է և գործում է աշխարհի ավելի քան 120 երկրում։-0-
