ԵՐԵՎԱՆ, 5 մայիսի. /Նովոստի-Արմենիա/. Մեքսիկայի բռնցքամարտի ֆեդերացիան պաշտոնապես հրաժարվել է մասնակցել աշխարհի պատանիների առաջնությանը գրիպի համաճարակի պատճառով, տեղեկացնում է Հայաստանի բռնցքամարտի ֆեդերացիան։
«Երևանում մայիսի 23-30-ն անցկացվելիք ԱԻԲԱ Բռնցքամարտի աշխարհի պատանիների առաջնությանը մասնակցության հայտ ներկայացրած Մեքսիկայի բռնցքամարտի ֆեդերացիան պաշտոնապես հրաժարվել է մասնակցությունից»,- ասվում է հաղորդագրությունում։
«Մեքսիկան այժմ գտնվում է ծանր դրության մեջ` կապված երկրում տարածված համաճարակի հետ: Թեև մեր բոլոր մարզիկների առողջական վիճակը կայուն է, բայց մենք չենք ուզում վտանգել առաջնության մյուս մասնակիցների առողջական վիճակը»,- իր նամակում ասում է Մեքսիկայի բռնցքամարտի ֆեդերացիայի նախագահ Ռիկարդո Կոնտրերասը:
Մեքսիկան առայժմ միակ երկիրն է, որը հայտ ներկայացնելուց հետո պաշտոնապես հրաժարվել է առաջնության մասնակցությունից։
Ներկայումս 48 երկրներ հաստատել են իրենց մասնակցությունը աշխարհի պատանեկան առաջնությանը։
Առաջին անգամ աշխարհի պատանեկան առաջնությունն անցկացվել է Բաքվում 2001 թվականին, և այդ առաջնությանը մասնակցել է 132 բռնցքամարտիկ 21 երկրից։ Նմանատիպ առաջնություն վերջին անգամ անցկացվել է նույնպես Բաքվում, որին մասնակցել է 230 մարզիկ աշխարհի 39 երկրից։ -0-
