Նախօրեին ծանր վիճակում «Էրեբունի» բժշկական կենտրոն տեղափոխված «Հայ Արիական Միություն» ազգայնական կուսակցության առաջնորդ Արմեն Ավետիսյանը վրաերթի է ենթարկվել, «Նովոստի-Արմենիա» գործակալությանը տեղեկացրեցին ՀՀ ոստիկանությունից:
«Մայիսի 4-ին ոստիկանության Էրեբունու բաժնում հաղորդում է ստացվել, որ ժամը 13.40-ին, անհայտ ավտոմեքենայի վարորդը Տիտոգրադյան փողոցի թիվ 14 շենքի մոտ վրաերթի է ենթարկել մոտ 50 տարեկան տղամարդու, որը մարմնական վնասվածքներով տեղափոխվել «Էրեբունի» բժշկական կենտրոն»,- ասված է հաղորդագրության մեջ:
«Ձեռնարկված միջոցառումների շնորհիվ պարզվել է, որ նշված վրաերթը կատարել է 1966թ. ծնված Շողակաթ Ամիրխանյանը` իր վարած «Ֆորդ Մերկուրի» մակնիշի ավտոմեքենայով:
Անցկացված բացատրական աշխատանքների շնորհիվ Շ. Ամիրխանյանը ներկայացել է բաժին և հայտնել, որ վրաերթը կատարել է Մ. Խորենացու և Ագաթանգեղոսի փողոցների խաչմերուկում և իր ավտոմեքենայով տուժողին տեղափոխել է Տիտոգրադյան փողոցի թիվ 14 հասցեում գտնվող պոլիկլինիկայի մոտ:
Պարզվել է նաև, որ տուժողը 1963 թ. ծնված Արմեն Ավետիսյանն է»,- ասված է հաղորդագրության մեջ:
Կատարվում է նախաքննություն:
Արմեն Ավետիսյանին ծանր վնասվածքներով հայտնաբերել են Էրեբունի հիվանդանոցի մոտ և, ըստ հիվանդության պատմության, ժամը 14-ին նրան ընդունել են Էրեբունի հիվանդանոց: Ավետիսյանին որպես անհայտ անձ բերել են հիվանդանոցին կից բժշկական քոլեջի մոտից անգիտակից վիճակում բազմաթիվ վնասվածքներով՝ գլխի, կրծքավանդակի, վերջույթների վնասվածքներով և գլխուղեղի արյան զեղումով
Հայ Արիական Միաբանությունը, Հայ ազգայնականների համախմբման խորհուրդն ու «Լուսանցք» հասարակական-քաղաքական շաբաթաթերթը երեքշաբթի հայտարարություն են տարածել, որում կատարվածը մահափորձ են անվանել:
«Հայ Արիական Միություն» ազգայնական կուսակցության առաջնորդ Արմեն Ավետիսյանը 2005 թվականին դատապարտվել է երեք տարվա ազատազրկման՝ ազգամիջյան երկպառակություն հրահրելու համար:
