Արմեն Ավետիսյանին ծանր վնասվածքներով հայտնաբերել են Էրեբունի հիվանդանոցի մոտ և, ըստ հիվանդության պատմության, ժամը 14-ին նրան ընդունել են Էրեբունի հիվանդանոց: Ավետիսյանին որպես անհայտ անձ բերել են հիվանդանոցին կից բժշկական քոլեջի մոտից անգիտակից վիճակում բազմաթիվ վնասվածքներով՝ գլխի, կրծքավանդակի, վերջույթների վնասվածքներով և գլխուղեղի արյան զեղումով, «Նովոստի-Արմենիա» գործակալությանը տեղեկացրեցին ՀԱՄ-ից: Ավետիսյանի համախոհները կատարվածը մահափորձ են համարում:
Հայ Արիական Միաբանության, Հայ ազգայնականների համախմբման խորհրդի, "Լուսանցք" հասարակական-քաղաքական շաբաթաթերթի հայտարարության մեջ ասվում է, որ մայիսի 4-ին, ժամը 10:00-ից 12:00-ի հատվածում Արմեն Ավետիսյանին երկու անգամ զանգահարել է ոմն Արկադի ազգային անվտանգությունից: 12:20-ի սահմաններում Արմեն Ավետիսյանը դուրս է եկել գրասենյակից այդ մարդուն հանդիպելու համար՝ «Այրարատ» կինոթատրոնի («Ռոսիա» տոնավաճառ) տարածքում: Պայմանավորվել էին հանդիպել 12:30-ին: Ժամը 13:10-ին Արմեն Ավետիսյանը զանգահարել է գրասենյակ և ասել, թե վերադառնում է: Դրանից հետո նրա հետ կապն ավարտվել է: 14:00-ին Ավետիսյանի հեռախոսն անջատվել է:
Հաղորդագրության մեջ ասվում է, որ Ավետիսյանի համախոհները նրան ծանր վնասվածքներով հայտնաբերել են Էրեբունի հիվանդանոցում, որտեղ նրան առաջին բուժօգնություն է ցուցաբերվել:
Ըստ ՀԱՄ-ի տեղեկատվության, ժամը 2:26-ին հետադարձ ազդանշան է ստացվել, որ Արմեն Ավետիսյանի հեռախոսը միացված է: «Մեզ պատասխանողը ներկայացավ որպես հետաքննիչ Գագիկ Հարությունյան և ասաց, որ իր մոտ է Արմեն Ավետիսյանի հեռախոսը, այն բերել է Արմեն Ավետիսյանին վրաերթի ենթարկած վարորդը, ով ներկայացել է անձամբ»,- ասված է հաղորդագրության մեջ:
Կատարվածի առնչությամբ հայտարարության հեղինակները դիմում են ՀՀ իշխանություններին և պահանջում, որ ջանք չխնայեն իսկությունը բացահայտելու համար:-0-
