Մարդկանց շրջանում H1N1 վիրուսով հարուցված գրիպի հետ կապված համաճարակաբանական իրավիճակը Հայաստանում մայիսի 3-ի դրությամբ հանգիստ է, հայտնվում է ՀՀ Առողջապահության նախարարության պաշտոնական կայքում։
«Հաշվի առնելով հանրապետության լայն սոցիալական, տնտեսական կապերը և բնակչության ակտիվ տեղաշարժը երկրներ, որտեղ արձանագրվել են մարդկանց շրջանում H1N1 վիրուսով հարուցված գրիպի դեպքեր, Հայաստանի Հանրապետություն վարակի ներբերման և տարածման կանխարգելման նպատակով ուժեղացվել է հսկողությունը «Զվարթնոց» միջազգային և «Շիրակ» օդանավակայաններում, բոլոր սահմանային անցումային կետերում, սահմանվել է բժշկական հսկողություն հատկապես H1N1 վիրուսով հարուցված գրիպի առումով անապահով երկրներից ժամանող ուղևորների նկատմամբ` ուղևորության ընթացքում և հիվանդության գաղտնի շրջանի առավելագույն ժամանակահատվածում ջերմողների և բնորոշ մյուս ախտանիշներով հիվանդների վաղաժամ հայտնաբերման նպատակով»,- ասվում է հաղորդագրության մեջ:
ՀՀ Առողջապահության նախարարության տվյալներով՝ հիմնված ԱՀԿ-ի տեղեկատվության վրա, աշխարհում բարձր ախտածին H1N1 վիրուսով հարուցված գրիպի համաճարակային իրավիճակը շարունակում է մնալ լարված` համաճարակային գործընթացում ընդգրկելով նոր տարածքներ:
2009թ. մայիսի 3-ի դրությամբ 16 երկիր պաշտոնական հաղորդագրություն են ներկայացրել մարդկանց շրջանում H1N1 վիրուսով հարուցված գրիպի 658 դեպքի մասին: Ամերիկայի միացյալ նահանգների կառավարությունը մայիսի 3-ի դրությամբ հաղորդել է մարդկանց շրջանում 160 լաբորատոր հաստատված դեպքի վերաբերյալ` 1 մահվան դեպքով, ընդ որում` համաճարակային գործընթացում ընդգրկվել է 21 նահանգ, իսկ Մեքսիկան` 397 լաբորատոր հաստատված դեպքի մասին` ներառյալ 16 մահվան դեպք:
Լաբորատոր հաստատված դեպքեր են արձանագրվել Կանադայում` 51, Նոր Զելանդիայում` 4, Մեծ Բրիտանիայում` 15, Իսրայելում` 3, Իսպանիայում` 13, Գերմանիայում` 6, Ավստրիայում` 1, Նիդերլանդներում` 1, Շվեցարիայում` 1, Դանիայում`1, Չինաստանում` 1, Կոստա Ռիկայում` 1, Ֆրանսիայում` 2, Հարավային Կորեայում` 1:
ՀՀ առողջապահության նախարարությունը հիշեցնում է, որ մարդկանց մոտ H1N1 վիրուսով հարուցված գրիպի հիմնական ախտանշաններն են` բարձր ջերմություն, գլխացավ, մկանային ցավ, հազ, անգինա, ռինիտ, որոշ մարդկանց մոտ նկատվել է նաև փսխում և դիարեա: Հիվանդության գաղտնի շրջանը 7 օր է: Հարուցիչը շրջակա միջավայրի առարկաների վրա պահպանվում է մոտ 2 ժամ:
Առողջապահության համաշխարհային կազմակերպութունը չի առաջարկում սահմանափակել ճանապարհորդությունները կամ փակել սահմանները: Մարդկանց խորհուրդ է տրվում հաճախակի լվանալ ձեռքերը` օճառով, և գրիպանման հիվանդության ախտանիշների դրսևորման դեպքում դիմել բժշկական օգնության:-0-
