Հայ պատգամավորները ՌԴ փորձագետների աջակցությունն են ակնկալում մարտյան անկարգությունների ժամանակ հատուկ միջոցներից մարդկանց մահվան հանգամանքները պարզելու հարցում

ԵՐԵՎԱՆ, 23 հունվարի. /Նովոստի-Արմենիա/. Մարտի 1-2-ին Երևանում տեղի ունեցած իրադարձությունների և դրանց պատճառների ուսումնասիրության ժամանակավոր հանձնաժողովը Հայաստանի գլխավոր դատախազությանն առաջարկել է դիմել ռուս փորձագետներին՝ 2008 թվականի մարտի 1-2-ի անկարգությունների ժամանակ հատուկ միջոցներից մարդկանց մահվան հանգամանքները պարզելու համար։

Նախագահական ընտրությունների արդյունքներից դժգոհ ընդդիմության՝ իրավապահ մարմինների հետ մարտի 1-2-ին տեղի ունեցած բախումների հետևանքով զոհվեց 10 մարդ, ավելի քան 200-ը վիրավորվեց։

Խոսքը «Չերյոմուխա» գազային նռնակի և փամփուշտների կիրառումից  զոհված երեք մարդկանց մասին է։

Ինչպես նիստի ընթացքում հայտնեց հանձնաժողովի ղեկավար Սամվել Նիկոյանը, ավելի վաղ ՀՀ գլխավոր դատախազությունը դիմել է նմանատիպ խնդրանքով «Չերյոմուխա» հատուկ միջոցների արտադրող ՌԴ ՆԳ  «Հատուկ տեխնիկա և  կապ» գիտաարտադրական միավորմանը։

Նիկոյանի խոսքերով, ԳԱՄ-ում պատասխանել են, որ լիազորված չեն անցկացնել ձգաբանական փորձաքննություն և չունեն տեղեկություններ կարաբինով փամփուշտների նույնականացման մեթոդիկայի մասին, որից կրակել են։

Միաժամանակ այդ հիմնարկում առաջարկել են դիմել ՌԴ ՆԳՆ Փորձագիտաքրեագիտական կենտրոն։

Միևնույն ժամանակ, Նիկոյանի խոսքերով, հատուկ միջոցների ռուսական արտադրողը հստակեցրել է ՀՀ հատուկ քննչական ծառայությանը հետաքրքրող մի շարք հարցեր։
                        
Մասնավորապես, ԳԱՄ մասնագետի խոսքերով, «Չերյոմուխա»-ի  փամփուշտները պիտանի են կիրառման առավելագույնը հինգ տարի:

Հայկական կողմը հետաքրքրվել է, հնարավո՞ր է, արդյոք, 1986 կամ 1989 թվականի հատուկ միջոցի նպատակային կիրառումը։

Մասնագետների եզրակացության համաձայն, «Չերյոմուխայի» փամփուշտների նպատակային կիրառման պիտանելիությունը կարող է որոշվել միայն նրանց՝ տեխնիկական բնութագրերին համապատասխան փորձարկումից հետո։        
   
Մասնագետները պնդում են, որ փամփուշտների ժամկետն անցնելուց հետո վատանում են դրանց մարտական բնութագրերը, բայց դա չի սպառնում մարդկանց կյանքին և առողջությանը։

Միաժամանակ «Չերյոմուխան» կարելի է կիրառել նաև բաց տարածքում, սակայն արգելվում է փամփաուշտներով կրակել անմիջապես մարդկանց վրա։ -0-