Միջազգային զարգացման ՕՊԵԿ հիմնադրամը Հայաստանին 14 մլն ԱՄՆ դոլարի չափով վարկ կտրամադրի
ԵՐԵՎԱՆ, 25 դեկտեմբերի. /Նովոստի-Արմենիա/. Միջազգային զարգացման ՕՊԵԿ (OPEC Fund for International Development - OFID) հիմնադրամը Հայաստանի կառավարությանը 14 մլն ԱՄՆ դոլարի չափով վարկ կտրամադրի, «Նովոստի-Արմենիա» գործակալությանը հայտնեցին ՀՀ ԱԳՆ մամուլի ծառայությունից:
«Համապատասխան համաձայնագիրը երեքշաբթի ստորագրել են ՀՀ-ում Ավստրիայի դեսպան Աշոտ Հովակիմյանը և OFID գործադիր տնօրեն Սուլեյման Ալ-Հերբիշը»,- ասվում է հաղորդագրությունում։
Վարկը հատկացվում է Հայաստանի կառավարությանը «Շուկայավարման հնարավորություն ֆերմերներին» ծրագրի իրականացման նպատակով: Ծրագիրը նախատեսում է վարկերի և ներդրումների միջոցով խթանել Հայաստանի գյուղական վայրերի տնտեսությունը։
«Հիմնադրամի գլխավոր տնօրենը գոհունակություն է հայտնել Հայաստանի կառավարության հետ համագործակցության առիթով և հետագայում ևս արդյունավետ համագործակցելու հույս հայտնել»,- նշվում է հաղորդագրությունում։
Իր հերթին, դեսպան Հովակիմյանը Հայաստանի կառավարության անունից շնորհակալություն է հայտնել տրամադրված վարկի և աջակցության համար: Նա մեծապես կարևորել է հիմնադրամի հետ համագործակցությունը և նշել, որ 2009թ.-ին նախատեսվող այցի ընթացքում գլխավոր տնօրենը հնարավորություն կունենա անձամբ տեսնելու հիմնադրամի միջոցներով իրականացված ծրագրերի արդյունքները: -0-
