Համաշխարհային բանկը կարող է աջակցություն ցուցաբերել ՀՀ սփյուռքի նախարարությանը

ԵՐԵՎԱՆ, 16 դեկտեմբերի. /Նովոստի-Արմենիա/. Երեքշաբթի ՀՀ սփյուռքի նախարար Հրանուշ Հակոբյանը Համաշխարհային բանկի Հայաստանյան գրասենյակի տնօրեն Արիստոմեն Վարուդակիսի հետ քննարկեց համագործակցության հեռանկարները:

Հրանուշ Հակոբյանը կարևորեց Համաշխարհային բանկի դերը Հայաստանում ծրագրերի իրականացման գործում: Նա հյուրին ներկայացրեց Սփյուռքի նախարարության այն ծրագրերը, որոնք հնարավոր է հովանավորվեն Համաշխարհային բանկի կողմից: 

Նախարարը հատկապես կարևորեց սփյուռքում կրթական հիմնախնդիրներին ուղղված ծրագրերը և հեռավար (դիստանցիոն) ուսուցման կազմակերպումը:

Իր հերթին Արիստոմենե Վարուդակիսը ներկայացրեց ՀՀ կառավարության հետ առաջիկա 4 տարիներին բանկի կողմից Երկրին օժանդակության ռազմավարության (ԵՕՌ) շրջանակներում նախատեսվող ծրագրերի մասին:

«Համաշխարհային բանկի Հայաստանյան գրասենյակի տնօրենը նշեց, որ կրթութան ոլորտում իրականացվելու են կարևոր ծրագրեր բարձրագույն կրթության համար, սակայն ընդհանուր նպատակը` կրթական որակի բարձրացումն է  նախադպրոցական և հանրակրթության ոլորտներում»,- նշվում է հաղորդագրությունում։

Կողմերը քննարկեցին նաև բարձր տեխնոլոգիաների միջոցով համահայկական մասնագիտական ցանցի ստեղծմանը, ինչպես նաև տեսակոնֆերանսների, հեռուստակամուրջների կազմակերպմանը վերաբերող հարցերում համագործակցության եզրերը:

Արիստոմենե Վարուդակիսը կարևորեց նախարարության նախաձեռնություններն ու առաջարկությունները և իր պատրաստակամությունը հայտնեց` աջակցելու նրա ծրագրերի իրականացմանն ու կապերի խթանմանը: -0-