ՀՀ խորհրդարանի խոսնակը ցավակցական ուղերձ է հղել հայտնի գիտնական Պարիս Հերունու մահվան կապակցությամբ
ԵՐԵՎԱՆ, 8 դեկտեմբերի. /Նովոստի-Արմենիա/. ՀՀ ԱԺ նախագահ Հովիկ Աբրահամյանը ցավակցական ուղերձ է հղել ակադեմիկոս Պարիս Հերունու մահվան կապակցութայմբ։
«Հայաստանի գիտությունների ազգային ակադեմիայի, աշխարհի տասնյակ ակադեմիաների ու միջազգային կազմակերպությունների անդամ, պետական մրցանակների դափնեկիր, ռադիոֆիզիկայի բնագավառում բազում գիտական աշխատությունների հեղինակ Պարիս Հերունու մահը մեծ կորուստ է հայ և համաշխարհային գիտության համար»,- ասվում է «Նովոստի-Արմենիա» գործակալությանը ՀՀ Ազգային Ժողովի հասարակայնության հետ կապերի վարչության կողմից տրամադրած հաղորդագրությունում։
Խորհրդարանի ղեկավարի խոսքերով, «Հերունու ուսումնասիրությունները գիտության նոր ոլորտների սկիզբ էին դառնում` գիտական աշխարհի մայրաքաղաքներից մեկը դարձնելով Երևանը»։
«ՀՀ Ազգային ժողովի և իմ անունից խորապես ցավակցում եմ Պարիս Հերունու հարազատներին, մերձավորներին, գործընկերներին` ծանր կորստի կապակցությամբ»,- նշվում է հաղորդագրությունում։
Հայտնի հայ գիտնական, մի շարք ակադեմիաների և միջազգային գիտական ասոցիացիաների անդամ, Գիտությունների ազգային ակադեմիայի ակադեմիկոս, տեխնիկական գիտությունների դոկտոր, պրոֆեսոր Պարիս Հերունին մահացավ կյանքի 75-րդ տարում։ -0-
