Հայաստանը ողջունում է Թուրքիայի՝ ԵՄ անդամ դառնալու ձգտումը. վարչապետ

ԵՐԵՎԱՆ, 4 դեկտեմբերի. /Նովոստի-Արմենիա/. Հայաստանը շահագրգռված է ունենալ կայուն և կանխատեսելի հարևաններ և ողջունում է Թուրքիայի՝ Եվրամիության անդամ դառնալու ձգտումը, հինգշաբթի հայտարարել է ՀՀ վարչապետ Տիգրան Սարգսյանը Վերակառուցման և զարգացման եվրոպական բանկի (ՎԶԵԲ) պատվիրակության հետ հանդիպման ընթացքում:

«Այն բարեփոխումները, որ այդ ճանապարհին կիրականացվեն, Թուրքիային կդարձնեն ավելի կանխատեսելի և կայուն»- մեջբերեցին վարչապետի խոսքերը կառավարության մամուլի ծառայությունից:

Միաժամանակ Սարգսյանը հույս է հայտնել, որ Հայաստանի հարաբերությունները Թուրքիայի հետ, այդ բարեփոխումներին զուգահեռ, կբարելավվեն:

ՀՀ վարչապետը նշել է նաև, որ Իրանի հետ Հայաստանն ունի բարիդրացիական հարաբերություններ և փորձելու է դրանք այսուհետ ևս պահպանել:

Անդրադառնալով ղարաբաղյան հակամարտության կարգավորման գործընթացին՝  ՀՀ կառավարության ղեկավարը հույս է հայտնել, որ քաղաքական երկխոսության, բանակցությունների միջոցով այն խաղաղ ճանապարհով կհանգուցալուծվի։ -0-

Ներկայումս Հայաստանի և Թուրքիայի միջև չկան դիվանագիտական հարաբերություններ, իսկ 1993-ից, պաշտոնական Անկարայի նախաձեռնությամբ, փակ է հայ-թուրքական սահմանը։

Պաշտոնական Երևանը հայտարարում է, որ պատրաստ է հարաբերություններ հաստատել Թուրքիայի հետ՝ առանց նախապայմանների։ Սակայն Թուրքիան երկկողմ հարաբերությունների հաստատաման համար առաջ է քաշում մի շարք նախապայմաններ, մասնավորապես, Հայաստանի կողմից Օսմանյան Թուրքիայում 1915թ.  իրագործված Եղեռնի ճանաչմանն ուղղված ջանքերից հրաժարվելը և ղարաբաղյան հիմնախնդրի լուծումը` հօգուտ Ադրբեջանի:--0—