Հայաստանի ոստիկանության և ԵԱՀԿ-ի միջև համագործակցության մասին հուշագիր է ստորագրվել

Հայաստանի ոստիկանության և ԵԱՀԿ երևանյան գրասենյակի միջև նախօրեին ստորագրված համագործակցության մասին հուշագիրը վկայում է այս կառույցների միջև հարաբերությունների զարգացման առաջադիմող ընթացքի մասին։

«Հուշագիրը նախատեսում է աշխատանքային խմբի ստեղծում, որը կզբաղվի ոստիկանության և բնակչության միջև գործընկերության ամրապնդմանը, ոստիկանության կրթական համակարգի բարելավմանն առնչվող հարցերով՝ հասարակական կարգի պահպանմանն աջակցելու նպատակով», - ստորագրման արարողության ժամանակ նշել է ՀՀ ոստիկանության պետ, գեներալ-մայոր Ալիկ Սարգսյանը։

Ստորագրված փաստաթղթի շրջանակներում նախատեսվում է աշխատանքային խմբի ստեղծում, որը կզբաղվի Հայաստանի համար համայնքային ոստիկանության մոդելի մշակման հարցերով՝ հիմնվելով Երևանի Արաբկիր համայնքի ոստիկանության բաժնում 2008 թվականի ապրիլից իրականացվող փորձնական ծրագրի վրա։

Սարգսյանի խոսքերով, Հուշագիրը ելնում է համատեղ շահերից և հետագայում կզարգանա փոխըմբռնման ոգով։

ԵԱՀԿ երևանյան գրասենյակի ղեկավար, դեսպան Սերգեյ Կապինոսն իր հերթին ասել է, որ Հայաստանի ոստիկանության և ԵԱՀԿ երևանյան գրասենյակի միջև համագործակցությունը, 2003 թ.-ից սկսած, դրական փորձ է կուտակել և այժմ թևակոխում է զարգացման նոր փուլ։

Նրա խոսքերով, շատ կարևոր է, որ Հուշագրում առկա են դեպի կոնկրետ նպատակներն առաջ գնալու մեխանիզմները, իսկ ԵԱՀԿ-ի խնդիրն է մեթոդների և իրագործվող խնդիրների միջոցների միասնականացումը։

Կապինոսն ընդգծել է ԵԱՀԿ-ի հետ համագործակցության նոր փուլում Հայաստանի ոստիկանության գործունեության երեք ուղղություն։ «Ոստիկանությունը պետք է անպայման կողմնորոշվի օրենքի գերակայությամբ, սահմանափակ կերպով խառնվի անձնական կյանքին, պատասխանատվություն կրի քաղաքացիների և պետական իշխանության մարմինների, հատկապես, խորհրդարանի առջև», - ասել է նա։

Կապինոսը նշել է, որ Հայաստանի ոստիկանության և ԵԱՀԿ գրասենյակի միջև համագործակցությունն արդեն կոնկրետ հաջողություններ է բերել ոստիկանության նախապատրաստական կենտրոնի վերակառուցմանն ուղղված նախագծի իրագործման և ուսուցողական ծրագրի մշակման գործում։

ԵԱՀԿ երևանյան գրասենյակը 2005 թ.-ից ոստիկանության աջակցության ծրագիր է իրականացնում Հայաստանում, որի շրջանակներում 2007 թ.-ի մարտին արդեն ավարտել է ոստիկանության ուսումնական կենտրոնի բարեկարգման աշխատանքները։

«Ապագա ծրագրերի հիմքում ընկած է ոստիկանության կադրերի պատրաստման նպատակով կրթության կատարելագործմանը, դասավանդող կազմի մակարդակի բարձրացմանը և կրթական ծրագրերի կատարելագործմանն ուղղված նպատակները», - ասել է Կապինոսը։

Կապինոսի խոսքերով, Երևանի համայնքներում ոստիկանական բաժանմունքների բարելավմանն ուղղված համագործակցության շրջանակներում մեկ այլ նախագիծ դեռևս ավարտված չէ, սակայն կնպաստի բնակչության և ոստիկանության միջև վստահության հաստատմանն ու խորացմանը, ինչն իր հերթին կնպաստի հանցագործությունների կանխման և բացահայտման ուղղությամբ արդյունավետ գործունեությանը։-0-