Հայաստանը կմասնակցի Ալբանիայում դեկտեմբերին անցկացվող երեխաների իրավունքների պաշտպանությանը նվիրված սեմինարին

ՀՀ ԱԺ ներկայացուցիչները կմասնակցեն Միջխորհրդարանական միության շրջանակներում կազմակերպվող երեխաների իրավունքների պաշտպանությանը նվիրված սեմինարին, որը կանցկացվի 2008 թ.-ի դեկտեմբերին Ալբանիայի մայրաքաղաքում, ասել է ՀՀ խորհրդարանի խոսնակ Հովիկ Աբրահամյանը Հայաստանում ՄԱԿ-ի մանկական հիմնադրամի (UNIСEF) ներկայացուցիչ Լեյլի Մոշիրի Ջիլանիի հետ հանդիպման ժամանակ։

Ինչպես չորեքշաբթի «Նովոստի-Արմենիա» գործակալությանը տեղեկացրել են ՀՀ ԱԺ հասարակայնության հետ կապերի վարչությունից, խոսնակը շնորհավորել է Ջիլանիին` հայաստանյան գրասենյակի ներկայացուցիչ նշանակվելու կապակցությամբ, ինչպես նաև կարևորել է խորհրդարանի հետ սերտ աշխատանքի արդյունավետությունը։

Աբրահամյանը նաև նշել է, որ երեխաների իրավունքների ու առողջության պաշտպանության հարցերը գերակա նշանակություն ունեն։ Նրա խոսքերով, Հայաստանի խորհրդարանը և կառավարությունը մեծ ուշադրություն են դարձնում այդ խնդիրներին:

Մոշիրի-Ջիլանին իր հերթին ՀՀ խորհրդարանի խոսնակին է ներկայացրել հիմնադրամի գործունեության հիմնական ոլորտները։

Նա կարևորել է օրենսդրության կատարելագործումը երեխաների իրավունքների և առողջության պաշտպանության հարցերում։ Մոշիրի-Ջիլանիի գնահատմամբ, օրենսդրական լուծումների կարիք կա նաև նորածին երեխաների համար արհեստական կերերի արգելման հարցում, որովհետև դրանք անցանկալի հետևանքներ են ունենում նրանց առողջության վրա:  

Մոշիրի-Ջիլանին Աժ նախագահին նաև իրազեկել է, որ նոյեմբերի 28-ին հիմնադրամը կազմակերպում է տարվա ընթացքում իրականացված ծրագրերի քննարկում, ինչպես նաև 2010-2014 թթ. ծրագրերի գերակայությունների որոշարկում։-0-