Հայ կանանց աշխատավարձը տղամարդկանց աշխատավարձի 60 տոկոսն է կազմում
Հայաստանում կանանց աշխատավարձը միջին հաշվարկով կազմում է տղամարդկանց աշխատավարձի 60 տոկոսը, ասաց ՀՀ աշխատանքի և սոցիալական հարցերի նախարարության Աշխատանքի և սոցիալական հետազոտությունների ազգային ինստիտուտի տնօրեն Գյուլնարա Հովհաննիսյանը։
«Աղքատությունն ու գործազրկությունը հանրապետությունում կնոջ կերպար են կրում», - նշեց նա երեքշաբթի՝ «ՀՀ աշխատանքի օրենսգիրքը՝ որպես գենդերային հավասարությանը նպաստող արդյունավետ մեխանիզմ» թեմայով կոնֆերանսի ընթացքում։
Հովհաննիսյանն ընդգծեց, որ Հայաստանի աշխատաշուկան մի ոլորտ է, որտեղ նկատվում է գենդերային խտրականության առավել սուր դրսևորում։ «Գոյություն ունի խտրականություն կանանց նկատմամբ աշխատանքի ընդունման, ինչպես նաև պաշտոնի բարձրացման հարցում», - ավելացրեց նա։
Հայաստանում UNDP մշտական ներկայացուցչի տեղակալ Դիրք Բոբերգը (Dirk Boberg) իր հերթին ասաց, որ գենդերային հավասարության արդյունավետ ապահովումը լուրջ խնդիր է ողջ աշխարհում։ «Կանանց իրավունքները շարունակվում են ոտնահարվել», - փաստեց նա։
Նրա խոսքերով, անհրաժեշտ է շարունակել աշխատանքը թույլ սեռի ներկայացուցիչների իրավիճակի բարելավման ուղղությամբ, քանի որ նրանք դեռևս լիիրավ հնարավորություն չունեն մասնակցելու որոշումների ընդունման գործում։
2007 թ.-ի նոյեմբերի 6-ին Հայաստանում UNDP մշտական ներկայացուցիչ Կոնսուելո Վիդալը և ՀՀ աշխատանքի և սոցիալական հարցերի նախարարության Աշխատանքի և սոցիալական հետազոտությունների ազգային ինստիտուտի տնօրեն Գյուլնարա Հովհաննիսյանը ստորագրել են համաձայնագիր երկրում գենդերային հավասարության ապահովման և կնոջ դերի բարձրացման ոլորտում։ Համաձայնագիրը ստորագրվել է Շվեդիայի կառավարության միջազգային զարգացման գործակալության հետ համատեղ 2004 թ.-ին սկսված ծրագրի շրջանակներում։
Փաստաթղթի համաձայն, ինստիտուտը, ՄԱԿ-ի Զարգացման ծրագրի հետ համագործակցելով, քաղծառայողների համար հետազոտություններ և սեմինարներ է անցկացնում՝ գենդերային խնդիրների և քաղաքականության մեջ կանանց մասնակցության իրավական հիմքերի մոդուլների վերաբերյալ։
Աշխատանքի և սոցիալական հետազոտությունների ազգային ինստիտուտը մասնակցում է հասարակությունում 2004-2010 թթ. կանանց իրավիճակի և նրանց դերի բարձրացման մասին ազգային ծրագրի համակարգման և իրականացման գործընթացում։-0-
