Լրագրողների շրջանում անցկացվող ֆուտզալի մրցաշարը կկայանա Երևանում
Հայկական ԶԼՄ-ների ներկայացուցիչների շրջանում «Ֆուտբոլը՝ հանուն հավասար հնարավորությունների» նշանաբանի ներքո ֆուտզալի երկրորդ մրցաշարը տեղի կունենա Երևանում՝ Հաշմանդամների իրավունքների պաշտպանության միամսյակի շրջանակներում, «Նովոստի-Արմենիա» գործակալությանը տեղեկացրեցին «Հույսի կամուրջ» հասարակական կազմակերպությունից։
Հաշմանդամների իրավունքների պաշտպանության միամսյակը անցկացվելու է 2008 թ.-ի նոյեմբերի 15-ից մինչև դեկտեմբերի 15-ը։
«Մրցաշարի հիմնական նպատակը հաշմանդամների համար հավասար հնարավորությունների ապահովման գաղափարի քարոզումն է», - ասվում է «Նովոստի-Արմենիա» գործակալություն ստացված տեղեկատվության մեջ։
Մրցաշարին մասնակցելու համար յուրաքնաչյուր լրատվամիջոց կարող է ներկայացնել մեկ թիմ։ Հայտերի ընդունման վերջնաժամկետը նոյեմբերի 12-ն է։
2007 թ.-ի նոյեմբերի 22-ին անցկացված առաջին մրցաշարին մասնակցել է յոթ թիմ՝ «Ազատ Առավոտ», «Կենտրոն», «Երկիր Մեդիա», «Մեդիամաքս», «Հայկ», «Արմնյուզ» և «Արևածաղիկ»։
Մրցաշարի կազմակերպիչն է «Հույսի կամուրջ» հասարակական կազմակերպությունը՝ «Արևածաղիկ» մանկապատանեկան ամսաթերթի հետ համատեղ։-0-
