Հայաստան են ժամանում Շվեյցարիայի Համադաշնության Դաշնային Ժողովի Շվեյցարիա-Հայաստան խորհրդարանական խմբի անդամները

Հոկտեմբերի 8-ին Հայաստան են ժամանում Շվեյցարիայի Համադաշնության Դաշնային Ժողովի Շվեյցարիա-Հայաստան խորհրդարանական խմբի անդամները` Քրիստին Էգերզեգի-Օբրիստի գլխավորությամբ, «Նովոստի-Արմենիա» գործակալությանը հայտնեցին ԱԺ հասարակայնության հետ կապերի վարչությունից։

Հոկտեմբերի 8-ին նախատեսված է հանդիպում ՀՀ նախագահ Սերժ Սարգսյանի հետ:

Ազգային ժողովում պատվիրակությանը կընդունի ՀՀ ԱԺ նախագահ Հովիկ Աբրահամյանը, նախատեսված է նաև հանդիպում ԱԺ Հայաստան-Շվեյցարիա բարեկամության խմբի անդամների հետ` խմբի ղեկավար Արա Բաբլոյանի գլխավորությամբ: Պատվիրակության անդամները կայցելեն նաև Լրատվամիջոցների կովկասյան ինստիտուտ:

Հոկտեմբերի 9-ին  Շվեյցարիայի Համադաշնության Դաշնային Ժողովի Շվեյցարիա-Հայաստան խորհրդարանական խմբի անդամներին կընդունեն ՀՀ արտաքին գործերի փոխնախարար Գեղամ Ղարիբջանյանը, ՀՀ էկոնոմիկայի փոխնախարար Արա Պետրոյանը:

Պատվիրակության անդամները կլինեն նաև հայ-շվեյցարական մասնագիտացված դպրոցում: Նույն օրը պատվիրակության անդամները Ծիծեռնակաբերդի հուշահամալիրում հարգանքի տուրք կմատուցեն հայոց ցեղասպանության զոհերի հիշատակին:

Հոկտեմբերի 10-ին Շվեյցարիայի Համադաշնության Դաշնային Ժողովի Շվեյցարիա-Հայաստան խորհրդարանական խմբի անդամները կլինեն Հայաստանում ԼՂՀ ներկայացուցչությունում: Նույն օրը նախատեսված է հանդիպում  ՀՀ փոխվարչապետ Արմեն Գևորգյանի հետ: 

Պատվիրակության անդամները հանդիպում կունենան նաև ընդդիմության ներկայացուցիչների հետ: Ազգային ժողովում կկազմակերպվի բարեկամության խմբերի համատեղ մամլո ասուլիսը: Նույն օրը  Շվեյցարիայի Համադաշնության Դաշնային Ժողովի Շվեյցարիա-Հայաստան խորհրդարանական խմբի անդամները կլինեն «Արաբկիր» և «ARBES» բժշկական կենտրոններում:

Հոկտեմբերի 11-ին պատվիրակության անդամներին  Մայր Աթոռ Սուրբ Էջմիածնում կընդունի Ն.Ս.Օ.Տ.Տ. Գարեգին Երկրորդ ամենայն հայոց կաթողիկոսը, այնուհետև նրանք կայցելեն Արագածոտնի մարզ, Բյուրականի աստղա‎ֆիզիկական աստղադիտարան:

Հոկտեմբերի 12-ին Շվեյցարիայի Համադաշնության Դաշնային Ժողովի Շվեյցարիա-Հայաստան խորհրդարանական խմբի անդամները կլինեն Շիրակի մարզում` Գյումրիի «Արևամանուկ» հոգեբանական կենտրոնում: Նույն օրը նախատեսված է հանդիպում «Օրգանական գյուղատնտեսության զարգացում» և «Խաղաղություն ու հաշտություն» ծրագրերի պատասխանատուների հետ:

Հոկտեմբերի 13-ին պատվիրակությունը կմեկնի Երևանից: -0--