ՀՀ կառավարությունը հաստատել է հնություն հանդիսացող և մշակութային արժեք ներկայացնող գողացված առարկաների հաշվառման կարգը
ԵՐԵՎԱՆ, 25 սեպտեմբերի. /Նովոստի-Արմենիա/. ՀՀ կառավարությունը հինգշաբթի նիստի ժամանակ հաստատել է հնություն հանդիսացող և մշակութային արժեք ներկայացնող գողացված առարկաների հաշվառման կարգը։
Ինչպես նիստի ժամանակ հայտնեց ՀՀ ոստիկանապետ Ալիկ Սարգսյանը, հնություն հանդիսացող և մշակութային արժեք ներկայացնող գողացված առարկաների հաշվառումն ու հաշվառումից հանելու կարգը հաստատվում է փաստաթղթով։
«Տվյալ կարգով հնություն հանդիսացող առարկաներ ասելով հասկանում ենք մշակութային նշանակություն ունեցող առարկաներ, որոնց տարիքը գերազանցում է 75 տարին և 50-ից ավելի տարիք ունեցող ստեղծագործություններ»,- տեղեկացրեց Ոստիկանության պետը։
Համաձայն հաստատված կարգի, որի տեքստը տեղակայված է երկրի կառավարության պաշտոնական կայքում, յուրաքանչյուր գողացված իրի համար բացվում է հատուկ տեղեկատվական խուզարկային քարտ, որը լրացվում է քննչական մարմնի կողմից և ուղարկվում ՀՀ Ոստիկանության տեղեկատվական կենտրոն։
Լրացված և Ոստիկանության տեղեկատվական կենտրոն ուղարկված քարտերից ձևավորվում է հատուկ քարտադարան։
Հնություն հանդիսացող և մշակութային արժեք ներկայացնող գողացված առարկաները հաշվառումից հանելու համար հիմք է հանդիսանում դրանց հայտնաբերումը, ինչպես նաև հարուցված քրեական գործի դադարեցումը։ --0--
