Գևորգյան Հոգևոր Ճեմարանում տեղի ունեցավ նոր ուսումնական տարվա բացման արարողությունը

 Անցյալ երեքշաբթի Մայր Աթոռ Սուրբ Էջմիածնի առաջնորդարանում տեղի ունեցավ Գևորգյան հոգևոր ճեմարանի 2008-2009 թթ. ուսումնական տարվա բացման արարողությունը:

Նոր ուսումնական տարվա բացման առիթով ճեմարանի սաներին շնորհավորեց ՀՀ Պաշտպանության նախարար Սեյրան Օհանյանը, հայտնում է Ս. Էջմիածնի Տեղեկատվական համակարգը։ Մեծապես կարևորելով եկեղեցու և բանակի համագործակցությունը` Օհանյանն ընդգծեց, որ այսուհետ այդ համագործակցությունը նոր որակ կստանա։

Նախարարը նշեց, որ Ամենայն Հայոց կաթողիկոսի օրհնությամբ և հայոց բանակի հոգևոր առաջնորդ Վրթանես եպիսկոպոս Աբրահամյանի հետ համատեղ մշակել են մի ծրագիր, համաձայն որի ոչ միայն հոգևորականները բանակում կիրականացնեն հոգևոր կրթադաստիարակչական առաքելություն, այլև բարձրաստիճան զինվորականները դասընթացներ կանցկացնեն հոգևոր կրթօջախներում:

Իր հերթին Նորին Սրբությունն անդրադարձավ հոգևորականի կոչմանն ու առաքելությանը ժողովրդի կյանքում` լինելու սերմնացաններ հայոց անդաստանում:

«Առաջին պատգամը, որ այսօր հնչում  է մեր սաների համար, սերմնացանի առակն է: Դաշտն իրենց` հայորդյաց հոգին է, որ պիտի հերկեն և պիտի մշակեն: Եվ այնտեղ պիտի ցանեն բարի հունդեր, որպեսզի արդյունքը լինի բեղուն և արգասաբեր», - նշեց Վեհափառ հայրապետը:

Հանդիսությանը ներկա էին Մայր Աթոռ Սուրբ Էջմիածնի միաբանները, ՀՀ Կրթության և գիտության նախարար Սպարտակ Սեյրանյանը, ՀՀ Պաշտպանության նախարար Սեյրան Օհանյանը, ՀՀ կառավարարության աշխատակազմի ազգային փոքրամասնությունների և կրոնի հարցերի վարչության պետ Վարդան Ասծատրյանը, բարձրաստիճան պաշտոնյաներ ու զինվորականներ: --0--