ՀՀ վարչապետն ու ՀԲ պատվիրակությունը քննարկել են համագործակցությունը կրթության ոլորտում

Հայաստանում Համաշխարհային բանկի կրթական ծրագրերի իրականացման հարցերն են չորեքշաբթի քննարկել ՀՀ կառավարության ղեկավար Տիգրան Սարգսյանը և ՀԲ Հայաստանի գրասենյակի տնօրեն Արիստոմենե Վարուդակիսն ու կրթության ծրագրերի ղեկավար Խուան Մանուել Մորենոն։

Ինչպես «Նովոստի-Արմենիա» գործակալությանը հայտնեցին կառավարության  հասարակայնության հետ կապերի վարչությունից, ՀԲ առաքելության անդամները Սարգսյանին պատմել են  կրթական ոլորտում ՀԲ-ի կողմից  մինչ այսօր իրականացված և առաջիկա 4 տարիներին բանկի կողմից երկրին օժանդակության  ռազմավարության (ԵՕՌ) շրջանակներում  նախատեսվող  կրթական ծրագրերի մասին։  

Առաքելության անդամները ՀՀ  վարչապետից հետաքրքրվել են նաև հիշյալ ոլորտում   ՀՀ կառավարություն ռազմավարության ներկայացված  ծրագրի վերաբերյալ նկատառումների մասին, քննարկել` առաջիկա տարիների նախապատրաստական աշխատանքների պատկերացումները:

Բանկի ներկայացուցիչները հայտնեցին, որ ՀԲ-ն նախատեսում է նորագույն տեխնոլոգիաների կիրառմամբ բարձրագույն դպրոցում կառավարության  ծրագրերին օժանդակության,  անհրաժեշտ ներդրումների  միջոցով  բարելավել  իրավիճակը`  անդրադառնալով  ոլորտի մինչ այժմ տեսադաշտից  դուրս մնացած բացերին ևս:

Իր հերթին վարչապետն ընդգծել է, որ կրթական ոլորտը ՀՀ կառավարության ծրագրով նախանշված գերակայությունների շարքում է, և այսօր չափազանց կարևորվում է կրթական համակարգի արդիականացման, կրթության որակի  բարձրացման խնդիրը:

Նշելով, որ  համակարգի ներկայիս վիճակը ՀՀ կառավարությանը չի բավարարում, Տիգրան Սարգսյանը կարևորել է ճիշտ կառավարման համակարգի ներդրումը,  որպեսզի «ոլորտում նախատեսվող ծրագրերը չմնան սոսկ թղթի վրա»։ «Որակի չափանիշները կարևոր է ոչ միայն մշակել, ներդնել, այլ նաև` պատշաճ  վերահսկել և խստապահանջ լինել կարևորագույն այս ոլորտի նկատմամբ»,-  ասել է վարչապետը:

ՀՀ կառավարության ղեկավարը նշել է նաև, որ Լիսաբոնյան հռչակագիրը միանգամայն համընկնում է ՀՀ  կառավարության պատկերացումներին, ըստ որի`  կարևորվում է համալսարանների վրա հիմված հասարակության ձևավորումը:

Հանդիպման ավարտին ՀՀ  վարչապետը շնորհակալություն է հայտնել ՀԲ-ին`  շահագրգիռ համագործակցության և կրթական ոլորտում կառավարության  ծրագրերին օժանդակության պատրաստակամության համար:--0--