ՀՀ արտգործնախարարը և ԱՄՆ պետքարտուղարի տեղակալը քննարկել են համագործակցությանն առնչվող հարցեր
Աշխատանքային այցով Վաշինգտոնում գտնվող ՀՀ արտգործնախարար Էդվարդ Նալբանդյանը հանդիպել է Եվրոպական և Եվրասիական հարցերով ԱՄՆ պետքարտուղարի տեղակալ Դանիել Ֆրիդի հետ, «Նովոստի-Արմենիա» գործակալությանը տեղեկացրեցին ՀՀ արտգործնախարարության մամուլի ծառայությունից։
«Նախօրեին տեղի ունեցած հանդիպման ընթացքում քննարկվել են հայ-ամերիկյան համագործակցության օրակարգի հարցերը, տարածաշրջանում անվտանգության և կայունության ապահովման հետ կապված խնդիրները և դրանց լուծման ուղիները», - նշեց ՀՀ արտգործնախարարության ներկայացուցիչը։
Նալբանդյանն ու Ֆրիդը մտքեր են փոխանակել նաև Հայաստանում հետընտրական զարգացումների պատճառների և հետևանքների, դրանց հաղթահարմանն ուղղված Հայաստանի իշխանությունների ձեռնարկած քայլերի մասին:
Փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։ Մարտի 1-2-ի բողոքի ցույցերը վերածվել են անկարգությունների և ցուցարարների ու իրավապահ մարմինների միջև բախումների, որոնց հետևանքով զոհվել է տասը քաղաքացի և վիրավորվել 265-ը։
Զրուցակիցները քննարկել են նաև հայ-թուրքական հարաբերությունների կարգավորման հեռանկարները:
Հայաստանի և Թուրքիայի միջև բացակայում են դիվանագիտական հարաբերությունները, իսկ հայ-թուրքական սահմանը փակ է 1993 թ.-ից՝ պաշտոնական Անկարայի նախաձեռնությամբ։-0-
