Հայկական եկեղեցու ներկայացուցիչը կմասնակցի միջկրոնական երկխոսությանը նվիրված միջազգային համաժողովին
ԵՐԵՎԱՆ, 15 հուլիսի. /Նովոստի-Արմենիա/. Ամենայն Հայոց Կաթողիկոս Գարեգին Երկրորդի օրհնությամբ Մայր Աթոռ Սուրբ Էջմիածնից Ֆրանսիայի Հայոց թեմի Առաջնորդ Նորվան արքեպիսկոպոս Զաքարյանը կմասնակցի հուլիսի 16-18-ը Իսպանիայի մայրաքաղաք Մադրիդի «FERIA DE MADRID» պալատում կայանալիք «Իսլամական համաշխարհային լիգայի» կողմից կազմակերպված Միջազգային համաժողովին` նվիրված միջկրոնական երկխոսությանը։
Ինչպես երեքշաբթի «Նովոստի-Արմենիա» գործակալությանը հայտնեցին Մայր Աթոռի տեղեկատվական համակարգից, համաժողովին մանակցում են թե քրիստոնյա և թե իսլամ հոգևորականներ և աշխարհականներ ամբողջ աշխարհից:
«Համաժողովի նպատակն է տարբեր դավանանքների մարդկանց բերել երկխոսության և համերաշխության»,- նշեց գործակալության զրուցակիցը։
Նրա խոսքերով, նախատեսվում են նաև քննարկումներ՝ կրոնների միջև համագործակցության ամրապնդման նպատակով:
Ժողովին կմասնակցեն և ելույթ կունենան նաև Սաուդյան Արաբիայի և Իսպանիայի թագավորները:-0-
