ՀՀ նախագահը բավարարված է հայ-իրանական հարաբերությունների մակարդակից
ՀՀ նախագահ Սերժ Սարգսյանը չորեքշաբթի ընդունել է Իրանի արտգործնախարարի առաջին տեղակալ Ալիռեզա Շեյխաթթարին, «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից։
«Հանդիպման ընթացքում նախագահ Սարգսյանը գոհունակությամբ փաստել է հայ-իրանական հարաբերությունների բնականոն զարգացումն ու երկու երկրների կայուն և հուսալի գործընկերությունը», - նշել են մամուլի ծառայությունից։
Իրանի արտգործնախարարի առաջին տեղակալն իր հերթին ընդգծել է երկկողմ համագործակցության բարձր մակարդակը՝ նշելով, որ առաջընթացի համար հիմք են ծառայում երկու ժողովուրդների պատմական խորը արմատները, դարավոր բարեկամությունն ու մշակութային ընդհանրությունները:
Շեշտելով, որ տնտեսական հարաբերությունները հիմնականում կենտրոնացել են ռազմավարական նշանակության խոշոր ծրագրերի իրականացման վրա, կողմերը կարևորել են նաև առևտրային կապերի խրախուսումը:
Հանդիպմանը Իրանի արտաքին քաղաքական գերատեսչության բարձրաստիճան պաշտոնյան համառոտակի ներկայացրել է Իրանի միջուկային ծրագրի շուրջ բանակցությունների վերջին զարգացումները:
Զրուցակիցներն անդրադարձել են նաև տարածաշրջանային խնդիրներին և ղարաբաղյան հակամարտության կարգավորման բանակցային գործընթացի ներկա փուլին:-0-
