ՀՀ նախագահը ղարաբաղյան հակամարտության կարգավորման ռազմական ուղի չի տեսնում

ՀՀ նախագահ Սերժ Սարգսյանը ղարաբաղյան հակամարտության կարգավորման ռազմական ուղի չի տեսնում։

«Եվս մեկ անգամ ասում եմ՝ ես ռազմական լուծում չեմ տեսնում։ Ուղին խաղաղությունն է։ Կարմիր գիծ կա և Ադրբեջանի, և Հայաստանի համար։ Անհրաժեշտ է գտնել այն սահմանը, որը կարող է մեզ մերձեցնել, որպեսզի մենք չանցնենք այդ գիծը», - ասել է ՀՀ նախագահը КоммерсантЪ Daily-ին տված հարցազրույցում։

Միաժաման Սարգսյանը կարծում է, որ չի կարելի բացառել Ղարաբաղի խնդրի լուծման ուժային տարբերակը, առավել ևս, որ ադրբեջանական ղեկավարությունը խոսում է ռազմական միջոցով հակամարտության լուծման հնարավորության մասին։

«Ես կարծում եմ, որ երկրում ամենաքիչը երկու մարդ՝ գերագույն գլխավոր հրամանատարն ու պաշտպանության նախարարը պետք է համարեն, որ ռազմական գործողությունները կարող են սկսվել թեկուզ վաղը։ Նշանակում է, բանակը պետք է մարտունակ լինի։ «Ոչ խաղաղության, ոչ պատերազմի» իրավիճակի բոլոր 14 տարիները մեծապես պահպանվում են այն բանի շնորհիվ, որ կա ուժերի հավասարակշռություն, և դրա խախտման դեպքում չի կարելի բացառել ռազմական գործողությունների վերսկսումը», - ասել է նա։

«Ադրբեջանը միակ երկիրն է, որը հպարտանում է ռազմական ծախսերի ավելացմամբ։ Եթե նրանք նույնիսկ հինգ րոպե համոզված լինեն, որ հաջողության կհասնեն, ապա կարող են գնալ ուժային տարբերակով։ Սակայն ես կարծում եմ, որ դա խնդրի լուծման ուղի չէ։ Մենք կարող ենք ամեն ինչ կարգավորել խաղաղ ճանապարհով, և մենք այդ մասին խոսել ենք Սանկտ-Պետերբուրգում՝ նախագահ Իլհամ Ալիևի հետ», - ավելացրել է Սարգսյանը։

ՀՀ նախագահի խոսքերով, նախագահների հանդիպումը կառուցողական էր, սակայն «մեկ բան է կառուցողական խոսել, մեկ այլ բան է՝ կառուցողական գործել»։

«Օրերս մեր տարածաշրջան են գալու Մինսկի խմբի՝ Ռուսաստանի, ԱՄՆ-ի և Ֆրանսիայի համանախագահները, որոնք կայցելեն Բաքու, Երևան և Ստեփանակերտ՝ կողմերի դիրքորոշումներին ծանոթանալու համար», - ասել է Սարգսյանը։

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։

1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։

1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։-0-