Հայ երգիչներն ու դերասանները, բարեգործական նպատակներով, պաղպաղակ են վաճառելու երեխաներին
ԵՐԵՎԱՆ, 30 մայիսի. /Նովոստի-Արմենիա/. Երևանի Հաղթանակի զբոսայգում հունիսի 2-ին կկայանա բարեգործական ակցիա՝ «Լավագույնը՝ մեր երեխաներին» խորագրով, որը նվիրված է Երեխաների պաշտպանության միջազգային օրվան։
«Միջոցառման շրջանակներում կանցկացվի աննախադեպ ակցիա-պաղպաղակի վաճառք։ Վաճառողների դերում այս անգամ հանդես կգան արվեստի հայտնի գործիչները», - ուրբաթ լրագրողներին Երևանում ասաց միջոցառման կազմակերպիչ, Հայ օգնության ֆոնդի Երեխաների աջակցութայն կենտրոնի տնօրեն Միրա Անտոնյանը։
Այսպես, ակցիային կմասնակցի ավելի քան 40 արվեստի գործիչ և հեռուստահաղորդավար, այդ թվում նաև հայկական էստրադայի ներկայացուցիչներ՝ երգիչ Արամեն և Հասմիկ Կարապետյանը։
«Լավագույնը՝ մեր երեխաներին» գրառումով գունագեղ գոգնոցներով արվեստի գործիչները առաջարկելու են պաղպաղակ, որոնք անվճար տրամադրել են մի շարք ընկերություններ», - ավելացրեց Անտոնյանը։
Բարեգործական ակցիայի համար իր արտադրանքը տրամադրել են այնպիսի ընկերություններ, ինչպիսիք են «Աշտարակ-կաթը», «Գրանդ-Քենդին», «Ասան», «Կոկալ-կոլան» և «Սոֆին»։
Կենտրոնի տնօրենը նաև տեղեկացրեց, որ պաղպաղակի սառնարանների կողքին տեղադրվելու են հատուկ արկղեր՝ միջոցներ հավաքելու նպատակով։
«Պաղպաղակի գնորդը կարող է ցանկացած գումար թողնել։ Պաղպաղակի վաճառքից հավաքած ողջ հասույթը կուղղվի սոցիալապես անապահով երեխաների համար տարբեր ծրագրի իրականացմանը», - պարզաբանեց նա։
Ակցիայի մասնակից, հայտնի դերասանուհի և հեռուստահաղորդավար Հրաչուհի Ութմազյանն իր հերթին ավելացրեց, որ ակցիայի շրջանակներում՝ ժամը 20։00-ին տեղի կունենա տոնական համերգ՝ հայկական էստրադայի ներկայացուցիչների մասնակցությամբ։
«Մենք ուզում ենք կազմակերպել իսկական տոն երեխաների համար՝ գունագեղ հրավառությամբ և խաղերով», - ավելացրեց նա։
Երեխաների պաշտպանության օրն անցկացնելու մասին որոշումն ընդունվել է Կանանց ժողովրդավարական միջազգային դաշինքի կողմից՝ 1949 թ.-ի նոյեմբերին կայացած հատուկ նստաշրջանի ժամանակ։
Երեխանի պաշտպանության միջազգային առաջին օրն անցկացվել է 1950 թ.-ին։ ՄԱԿ-ը սատարել է այդ նախաձեռնությանը և հայտարարել է երեխաների իրավունքների, կյանքի և առողջության պաշտպանությունը՝ իր գործունեության առաջնահերթ ուղղություններից մեկը։
Հայ օգնության ֆոնդի «Երեխաների աջակցության կենտրոնը» հիմնադրվել է 2000 թ.-ին։ Կենտրոնի հիմնական նպատակը օգնության տրամադրումն է ծնողազուրկ երեխաներին, հոգեկան տարբեր խնդիրներ ունեցող երեխաներին, ինչպես նաև նրանց ապաստան տրամադրելն է։-0-
