«Ժառանգություն» ընդդիմադիր խմբակցությունը հրաժարվելու է գլխավորել նորաստեղծ խորհրդարանական հանձնաժողովները. խմբակցության քարտուղար
ԵՐԵՎԱՆ, 27 մայիսի./Նովոստի-Արմենիա/. «Ժառանգություն» ընդդիմադիր խմբակցությունը մտադիր է հրաժարվել գլխավորել նոր խորհրդարանական հանձնաժողովները, որոնք նախատեսվում է ստեղծել ՀՀ ԱԺ կանոնակարգում կատարված փոփոխությունների համաձայն, որոնք ընդունվել են նախօրեին, հայտնեց «Ժառանգություն» ընդդիմադիր խմբակցության քարտուղար Ստեփան Սաֆարյանը։
Փոփոխություններով նախատեսվում է գյուղատնտեսության, բնապահպանության և բնօգտագործման հարցերով հանձնաժողովի, տարածքային կառավարման և տեղական ինքնակառավարման հանձնաժողովի և սոցիալական հարցերի հանձնաժողովի ստեղծում։ Կանոնակարգում արված փոփոխությունների արդյունքում Ազգային ժողովի մշտական հանձնաժողովների թիվը հասել է 12-ի։
«Եթե մեր խմբակցությանն առաջարկվի խորհրդարանական նոր հանձնաժողովներից մեկի նախագահի պաշտոնը, մենք մտադիր ենք հրաժարվել, քանի որ դրանց ստեղծումը զուտ ձևական մոտեցում ենք համարում»,- ասաց նա երեքշաբթի՝ մամուլի ասուլիսի ժամանակ։
Սաֆարյանի խոսքով, «հանձնաժողովները ստեղծվում են կոալիցիոն համաձայնագրի շրջանակներում, և դրանց նպատակն է ոչ թե բարձրացնել խորհրդարանական ընդդիմության դերը, այլ բավարարել կոալիցիայի նոր անդամ «Օրինաց երկիր» կուսակցության շահերը։
Մարտի 21-ին Հայաստանում ձևավորվել է նոր իշխող կոալիցիա, որի մեջ մտնում են Հայաստանի հանրապետական կուսակցությունը, «Բարգավաճ Հայաստան», «Օրինաց երկիր» ր ՀՅԴ կուսակցությունները։
Այսօրվա դրությամբ Հայաստանի խորհրդարանում գործում են ինը մշտական հանձնաժողովներ՝ արտաքին հարաբերությունների հանձնաժողով, եվրոպական ինտեգրման հանձնաժողով, կրթության, գիտության, մշակույթի, երիտասարդության և սպորտի հարցերի հանձնաժողով, պետաիրավական հարցերի հանձնաժողով, մարդու իրավունքների պաշտպանության և հանրային հարցերի հանձնաժողով, պաշտպանության, ազգային անվտանգության և ներքին գործերի հանձնաժողով, սոցիալական, առողջապահության և բնապահպանության հարցերի հանձնաժողով, ֆինանսավարկային և բյուջետային հարցերի հանձնաժողով, տնտեսական հարցերի հանձնաժողով։ Բարեփոխված Սահմանադրության համաձայն, Հայաստանի խորհրդարանում կարող են գործել 12 մշտական հանձնաժողովներ։--0—
