Ամենայն Հայոց Կաթողիկոս Գարեգին Երկրորդը օրհնեց ՀՀ նախագահ Սերժ Սարգսյանին

Ամենայն Հայոց Կաթողիկոս Գարեգին Երկրորդը օրհնեց ՀՀ նախագահ Սերժ Սարգսյանին։

«Այսօր մեր ժողովուրդը նոր պետություն է կառուցում՝ հույս ունենալով տեսնել այն բարգավաճ և հետամուտ լինելով ազգային արժեքներին», - ասաց Գարեգին Երկրորդը։

Կաթողիկոսը նշեց, որ Սարգսյանը լուրջ ներդրում է  ունեցել՝ պետականության կառուցման գործում, որը անհրաժեշտ է զարգացնել և բազմապատկել։

«Մեր ժողովուրդը դեռևս ապրում է հետընտրական զարգացումները, ինչը մեծ ջանքեր է պահանջում՝ հասարակությունում համբերատարություն և համաձայնություն տարածելու առնչությամբ», - ասաց Գարեգին Երկրորդը։

Ամենայն Հայոց Կաթողիկոսը համոզմունք հայտնեց, որ անցկացվող ծրագրերը վկայում են այն մասին, որ մոտ տարիներին կհաղթահարվեն զարգացման և առաջընթացի ճանապարհին կանգնած խոչընդոտները։

«Եկեղեցին աջակցելու է ձեզ, ինչպես դա եղել է դարեր ի վեր, քանի որ մենք միասին պետք է կառուցենք մեր պետությունը, որտեղ պետք է  չլինեն պառակտում և տարաձայնություններ», - ասաց Գարեգին Երկրորդը։

Կաթողիկոսը կարևորեց Ղարաբաղի անկախության և Հայոց ցեղասպանության ճանաչմանն ուղղված պայքարում սփյուռքի ներգրավվումը։

Նա դիմեց Ռոբերտ Քոչարյանին, որն այսօր ավարտեց իր նախագահական լիազորությունները և ցանկացավ նրան հաջողություններ ապագա գործունեության մեջ՝ նշելով, որ նրա ղեկավարման ժամանակաշրջանում իրականացված բարեփոխումները լավ հիմք են դարձել՝ փոխակերպումների շարունակության համար։

«Սարգսյանի նախագահության շրջանը պետք է նոր էջ դառնա հայ  ժողովրդի պատմության մեջ և նշանավորվի առաջընթացի և Հայաստանի ու հայերի առաջընթաց զարգացման փուլով», - ասաց Գարեգին Երկրորդը։

Սերժ Սարգսյանն այսօր Ալ. Սպենդիարյանի անվան օպերայի և բալետի ազգային ակադեմիական թատրոնում կայացած  Ազգային ժողովի հատուկ նիստում ժողովրդին տրված երդմամբ ստանձնեց  նախագահի պաշտոնը։

ՀՀ գործող վարչապետ  Հայաստանի հանրապետական կուսակցության առաջնորդ Սերժ Սարգսյանը փետրվարի 19-ին  կայացած նախագահական ընտրությունների արդյունում հաղթանակ է տարել՝ հավաքելով ընտրողների ձայների 52,82 տոկոսը։ Եվրոպայի և ԱՊՀ դիտորդական առաքելություններն ընտրությունները ճանաչել են ժողովրդավարության չափանիշներին համապատասխան։

Հանրապետության երրորդ նախագահը երդվեց  յոթերորդ դարի  Վեհամոր Ավետարանի և ՀՀ Սահամանադրության  Մայր օրինակի վրա։

Նորընտիր նախագահի երդման տեքստում ասված է. «Ստանձնելով Հայաստանի Հանրապետության նախագահի պաշտոնը՝ երդվում եմ. անվերապահորեն կատարել Սահմանադրության պահանջները՝ հարգել մարդու և քաղաքացու իրավունքներն ու ազատությունները, ապահովել հանրապետության անկախությունը, տարածքային ամբողջականությունը և անվտանգությունը՝ ի փառս Հայաստանի Հանրապետության և ի բարօրություն Հայաստանի Հանրապետության ժողովրդի»։

ՀՀ նորընտիր նախագահ Սերժ Սարգսյանի երդմնակալության արարողությանը մասնակցում են  58 երկրների պաշտոնական պատվիրակություններ, 12 միջազգային կազմակերպությունների ներկայացուցիչներ։--0-