Փոփոխություններ և լրացումներ կարվեն Հայաստանի քրեական օրենսգրքում
Հինգշաբթի տեղի ունեցած նիստի ժամանակ կառավարությունը հավանություն է տվել «ՀՀ քրեական օրենսգրքում փոփոխություններ և լրացումներ կատարելու մասին» օրինագծին:
«Առաջարկվող փոփոխություններն ու լրացումները պայմանավորված են ՀՀ սահմանադրական կարգի հիմունքների և պետության անվտանգության դեմ ուղղված հանցագործությունների համար պատիժներն առավել հիմնավորված դարձնելու խնդրի լուծման անհրաժեշտությամբ», - հինգշաբթի «Նովոստի-Արմենիա» գործակալությանը տեղեկացրեցին ՀՀ կառավարության աշխատակազմի մամուլի և հասարակայնության հետ կապերի վարչությունից։
Վարչությունից նշեցին, որ արված բոլոր առաջարկությունները համապատասխանում են միջազգային իրավական չափանիշներին:
«Բացի այդ, հանգամանորեն ուսումնասիրվել է արտասահմանյան երկրների փորձը, ինչը ևս վկայում է նշված օրենսդրական նախաձեռնության անհրաժեշտության մասին», - տեղեկացրեցին մամուլի ծառայությունից։
Այդ օրինագիծը համարվել է անհետաձգելի՝ խորհրդարանի կողմից քննարկման համար։-0-
