Հայաստանի խորհրդարանն արտահերթ նիստում կքննարկի հանրահավաքներ անցկացնելու մասին օրենքում փոփոխություններ մտցնելու հարցը

Հայաստանի Ազգային ժողովը երկուշաբթի արտահերթ նիստ կանցկացնի՝ «Ժողովներ, հանրահավաքներ, երթեր և ցույցեր անցկացնելու մասին» ՀՀ օրենքում երկու ընթերցումով փոփոխություններ և լրացումներ կատարելու նպատակով։

Ինչպես «Նովոստի-Արմենիա» գործակալությանը հայտնեցին Ազգային ժողովի հասարակության հետ կապերի վարչությունից,  ՀՀ Սահմանադրության 70-րդ հոդվածի համաձայն, Ազգային ժողովի պատգամավորների նախաձեռնությամբ` 2008 թ. մարտի 17-ին, ժամը 18.30-ին կանցկացվի արտահերթ նիստ։

Կանոնադրության համաձայն, արտահերթ նիստն անցկացվում է հերթական նստաշրջանի ընթացքում։ Քառօրյայի ընթացքում արտահերթ նիստը կարող է գումարվել 18։30-ից մինչև 24։00-ն։ Օրակարգի հարցերի քննարկումից հետո արտահերթ նիստը համարվում է փակված։

Փետրվարի 20-ից Երևանի կենտրոնում, ՀՀ նախկին նախագահ Լևոն Տեր-Պետրոսյանի գլխավորությամբ, ընդդիմությունն անցկացնում էր հանրահավաքներ, քայլերթեր՝ բողոքելով փետրվարի 19-ի նախագահական ընտրությունների արդյունքների դեմ, որոնցում հաղթանակ էր տարել վարչապետ Սերժ Սարգսյանը։

Մարտի 1-ին բողոքի ցույցերը վերածվել են անկարգությունների և ցուցարարների և իրավապահների ընդհարման, որի արդյունքում մահացել է ութ մարդ։ Ստեղծված իրավիճակի կապակցությամբ նախագահ Ռոբերտ Քոչարյանը մարտի 1-ին մայրաքաղաքում 20 օր ժամկետով արտակարգ դրություն մտցնելու մասին հրամանագիր է ստորագրել։

Կատարված իրադարձությունների համատեքստում մարտի 5-ին ուսանողների հետ հանդիպման ժամանակ Հայաստանի նախագահ Ռոբերտ Քոչարյանը նշել է միևնույն քաղաքական ուժի կողմից նույն տեղում պարբերական հանրահավաքներ անցկացնելն արգելելու անհրաժեշտությունը։

«Անհրաժեշտ է բացառել մշտական հանրահավաքների անցկացման ոճը, որպեսզի խուսափենք նման իրավիճակի կրկնությունից»,-ասել է նա։-0-