Ղարաբաղի ղեկավարությունը սահմանին կատարվածի պատասխանատվությունն ամբողջովին դնում է Ադրբեջանի վրա
Լեռնային Ղարաբաղի ղեկավարությունը սահմանին կատարվածի ամբողջ պատասխանատվությունը դնում է Ադրբեջանի ղեկավարության վրա։
Մարտի 3-ի լույս 4-ի գիշերը Ադրբեջանի զինված ուժերի 20 հոգուց բաղկացած հատուկ նշանակության ջոկատը գրոհել է ԼՂՀ Մարտակերտի շրջանի Լևոնարխ բնակավայրի մերձակայքում տեղակայված ԼՂՀ Պաշտպանության բանակի առաջատար մարտական դիրքերից մեկը և ժամանակավորապես այն վերցրել իր վերահսկողության տակ` դրանով իսկ կոպտորեն խախտելով 1995թ. փետրվարի 6-ի հրադադարի ռեժիմի պահանջները: Սակայն ձեռնարկված գործողությունների արդյունքում դիվերսիոն-գրոհային խումբը ետ է շպրտվել նախկին դիրքերը` կրելով զգալի կորուստներ:
«ԼՂՀ ղեկավարությունը կատարվածի ամբողջ պատասխանատվությունը դնում է Ադրբեջանի վրա և միջազգային միջնորդական առաքելությունից և ԵԱՀԿ-ից պահանջում է անցկացնել միջադեպի պատճառների ու հանգամանքների մանրազնին հետաքննություն, պաշտոնական քաղաքական գնահատական տալ Ադրբեջանական Հանրապետության ղեկավարության գործողություններին»,- ասվում է ԼՂՀ ԱԳՆ մամուլի ծառայության կողմից «Նովոստի-Արմենիա» գործակալությանը տրամադրված հաղորդագրության մեջ։
ԼՂՀ ԱԳՆ-ն նաև պահանջում է ճգնաժամ-դիտարկում անցկացնել միջադեպի գոտում` հետագայում հրադադարի ռեժիմի նման խախտումները կանխարգելելու համար:
Հայտարարության մեջ ասվում է, որ ԼՂՀ ղեկավարությունը տվյալ միջադեպը դիտարկում է որպես Ադրբեջանի կողմից տարիներ շարունակ տարվող ռազմական հռետորության ու սպառնալիքի քաղաքականության ուղղակի հետևանք, ինչը ադրբեջանա-ղարաբաղյան հակամարտության գոտում նոր լարվածություն է ստեղծում, վտանգում տարածաշրջանային անվտանգությունն ու կայունությունը: Ադրբեջանի այս դիրքորոշումը ԵԱՀԿ Մինսկի խմբի համանախագահ-երկրների կողմից վճռական հակազդեցության չի արժանանում:
Շփման գծի միջադեպը հերթական անգամ ընդգծում է ղարաբաղյան հակամարտության գոտում միջազգային հանրության կողմից կրակի դադարեցման ռեժիմի ամրապնդմանն ու խաղաղության անշրջելիության ապահովմանն ուղղված անհետաձգելի միջոցառումների անհրաժեշտությունը, ինչի մասին ղարաբաղյան կողմը բազմիցս կոչ է արել ինչպես Ադրբեջանին, այնպես էլ միջազգային միջնորդներին:
Այս կապակցությամբ ԼՂՀ իշխանությունների պաշտոնական տեսակետն արտացոլող համապատասխան նոտա է հղվել նաև ԵԱՀԿ Գործող նախագահին, ԵԱՀԿ Մինսկի խմբի` ԱՄՆ, ՌԴ և Ֆրանսիայի համանախագահներին, ԵԱՀԿ Գործող նախագահի անձնական ներկայացուցչի գրասենյակ: --0--
