Տաջիկստանի նախագահը հուսով է, որ Հայաստանի հետ հարաբերությունները հետագա զարգացում կունենան
Տաջիկստանի նախագահ Էմոմալի Ռահմոնը հուսով է, որ Հայաստանի հետ հարաբերությունները հետագա զարգացում կունենան Սերժ Սարգսյանի նախագահության ընթացքում։
«Տաջիկստանը բարձր է գնահատում գործընկերային հարաբերությունները Հայաստանի Հանրապետության հետ, որոնք համապատասխանում են երկու պետությունների ազգային շահերին», - ասվում է փետրվարի 19-ի նախագահական ընտրություններում հաղթանակ տարած ՀՀ վարչապետ Սերժ Սարգսյանին հասցեագրված Էմոմալի Ռահմոնի շնորհավորական ուղերձում։
Ինչպես «Նովոստի-Արմենիա» գործակալությանը տեղեկացրեցին ՀՀ կառավարության աշխատակազմի տեղեկատվության և հասարակայնության հետ կապերի վարչությունից, իր ուղերձում Ռահմոնը համոզմունք է հայտնել, որ ՀՀ նախագահի պաշտոնում Սարգսյանի գործունեության ընթացքում բազմակողմանի հայ-տաջիկական փոխգործակցությունը նոր զարգացում կստանա` իրավահավասարության, փոխադարձ հարգանքի ու միմյանց շահերը հաշվի առնելու հիմքի վրա:
«Օգտվելով հնարավորությունից՝ հայտնում եմ մեր պատրաստակամությունը առավելագույն ջանքեր գործադրելու Տաջիկստանի Հանրապետության և Հայաստանի Հանրապետության միջև համագործակցության հետագա ընդլայնման և խորացման համար», - ասել է նա։
Նա ՀՀ նորընտիր նախագահին ցանկացել է քաջառողջություն և հաջողություններ աշխատանքում, իսկ բարեկամ հայ ժողովրդին` խաղաղություն և բարգավաճում։-0-
