«Գալա» հեռուստաընկերության տնօրենը Գյումրիում ընտրակաշառք բաժանելու վերաբերյալ դատախազությանը դեռևս որևէ փաստ չի ներկայացրել. գլխդատախազություն

ԵՐԵՎԱՆ, 19 փետրվարի./Նովոստի-Արմենիա/. «Գալա» հեռուստաընկերության տնօրեն Վահան Խաչատրյանը Գյումրիում ընտրակաշառք բաժանելու վերաբերյալ  դատախազությանը  դեռևս որևէ փաստ, կամ տվյալ չի ներկայացրել։

Ինչպես «Նովոստի-Արմենիային» հայտնեցին ՀՀ գլխավոր դատախազությունից՝ 2008 թվականի փետրվարի 18-ին «Գալա» հեռուստաընկերության եթերում հեռարձակվել է  լուրերի հատուկ թողարկում, որի ընթացքում հեռարձակվել է Գյումրի քաղաքում և Շիրակի մարզում ընտրակաշառքներ բաժանելու մասին տեսանյութ՝ առանց կոնկրետ փաստեր մատնանշելու:

Հեռարձակված տեսանյութում մատնանշված փաստերը ստուգելու համար՝ Շիրակի մարզի դատախազը նույն օրը՝ 18.02.08թ.,  գրավոր դիմել է «Գալա» հեռուստաընկերությանտնօրեն Վ.Խաչատրյանին՝ խնդրելով,  ՀՀ քրեական դատավարության օրենսգրքի 179-րդ հոդվածով սահմանված կարգով, տրամադրել տեսանյութի հիմքերը:

Մատնանշված հոդվածի համաձայն՝ «Հանցագործությունների մասին հաղորդումներ հրապարակած կամ ըստ պատկանելության ուղարկած լրատվության միջոցները, ինչպես նաև այդ հաղորդումների հեղինակները պարտավոր են հետաքննության մարմնի, քննիչի, դատախազի պահանջով ներկայացնել հանցագործության մասին հաղորդումը հաստատող` իրենց մոտ եղած նյութերը»:

Հաղորդագրության համաձայն՝ Շիրակի մարզի դատախազի գրությունը 18.02.08թ.՝ ժամը 16:30-ի սահմաններում ստացել է անձամբ Վ.Խաչատրյանը, սակայն որևէ փաստ կամ տվյալ դեռևս դատախազությանը չի ներկայացրել:--0--