Հայաստանի գլխավոր դատախազը վճռականորեն կպայքարի ընտրախախտումների դեմ
Հայաստանի գլխավոր դատախազ Աղվան Հովսեփյանը հայտարարել է, որ երկրի իրավապահ մամինները վճռականորեն կպայքարեն փետրվարի 19-ին կայանալիք նախագահական ընտրությունների ընթացքում տեղի ունենալիք հնարավոր ընտրախախտումների դեմ։
«Հավատացնում եմ, որ ոչ մի խախտում կատարող չի խուսափի պատասխանատվությունից»,- ասված է գլխավոր դատախազի՝ երկուշաբթի «Ռիա-Նովոստի» գործակալությանը տրամադրած հայտարարության մեջ։
Նրա խոսքերով, Հայաստանի իրավական համակարգն ունի վճռականություն, կամք և ի զորու է պայքարել հնարավոր ընտրախախտումների, ընտրական գործընթացը խաթարելուն ուղղված օրինախախտումների դեմ, պաշտպանել հասարակական կարգն ու երկրի սահմանադրական կարգը:
«Հայաստանի Հանրապետության յուրաքանչյուր քաղաքացի, ում 18 տարին արդեն լրացել է, իրավունք ունի մասնակցելու ընտրությանը և ազատ արտահայտելու իր քաղաքական կամքը, որի խոչընդոտումը համարվում է քրեական հանցագործություն»,-նշել է գլխավոր դատախազը։
Նա մասնավորապես նշել է, որ ազատազրկման ձևով քրեական պատասխանատվություն է նախատեսված ընտրողի կամքի ազատ արտահայտմանը խոչընդոտելու, ընտրությունների արդյունքները կեղծելու, ընտրական հանձնաժողովների աշխատանքներին խոչընդոտելու, ինչպես նաև զինված ընտրական տեղամաս մուտք գործելու համար։
Հովսեփյանը նշել է, որ փետրվարի 19-ին կայանալիք ՀՀ նախագահի ընտրությունները կարևոր իրադարձություն են մեր երկրի և ժողովրդի համար: Ընտրական այս գործընթացում հնարավոր ընտրախախտումները կանխելու, դրանց օպերատիվ արձագանքելու նպատակով, գլխավոր դատախազի հրամանով, դատախազությունում ձևավորվել է աշխատանքային խումբ, որը հսկողություն է իրականացնում ընտրախախտումների վերաբերյալ հաղորդումների ընդունման, գրանցման և քննարկման նկատմամբ։
«Անուշադրության չի մատնվել ոչ մի հաղորդում, քննարկման առարկա են դարձել բոլոր ահազանգերը, և այսուհետ նույնպես այդ աշխատանքները կշարունակվեն»,-նշել է Հովսեփյանը։-0-
