ՀՀ նախագահի թեկնածու Արման Մելիքյանը մյուս թեկնածուների նախընտրական քարոզարշավը քաղաքակիրթ անվանեց
ԵՐԵՎԱՆ, 1 փետրվարի./Նովոստի-Արմենիա/. ՀՀ նախագահի թեկնածու Արման Մելիքյանը մյուս թեկնածուների նախընտրական քարոզարշավը քաղաքակիրթ անվանեց։
«Նախորդ շաբաթներին տեղի ունեցած թե իշխանամետ և թե ընդդիմադիր թեկնածուների նախընտրական քարոզարշավը ես բավական քաղաքակիրթ եմ համարում»,- ասաց նա։
Մելիքյանը նաև նշեց, որ մինչ օրս նրա առջև իր սեփական նախընտրական քարոզարշավն իրականացնելու համար խոչընդոտներ չեն ծառացել։
«Անձամբ ես որևէ խնդիր չեմ ունեցել, թեև պետք է նշեմ, որ մյուս ընդդիմադիր թեկնածուների համեմատ մեր ռեսուրսները բավական սուղ են»,- ասաց Մելիքյանն, ավելացնելով, որ նա շտաբ չի ձևավորում, տարածք չի վարձակալում և պաստառներ չի տպագրում։
Նախագահական ընտրությունները Հայաստանում տեղի կունենան փետրվարի 19-ին։ Հայաստանի կենտրոնական ընտրական հանձնաժողովը գրանցել է բոլոր ինը թեկնածուներին, որոնք հանձնել են իրենց փաստաթղթերը՝ հանրապետության ղեկավարի ընտրություններին մասնակցելու համար։
Հունվարի 21-ին պաշտոնապես մեկնարկեց թեկնածուների նախընտրական քարոզարշավը, որը տևելու է մինչև փետրվարի 17-ը։--0—
