Հայաստանի վարչապետը չափազանց կարևորում է ԵԱՀԿ/ԺՀՄԻԳ դիտորդական առաքելության այցը Հայաստան
Հայաստանի վարչապետ Սերժ Սարգսյանը չափազանց կարևոր է համարել նախագահական ընտրությունների կապակցությամբ ԵԱՀԿ /ԺՀՄԻԳ դիտորդական առաքելության այցը մեր երկիր։
Այս մասին Հայաստանի կառավարության ղեկավարը հայտարարել է հինգշաբթի՝ ԵԱՀԿ/ԺՀՄԻԳ դիտորդական առաքելության ղեկավար, դեսպան Գերտ-Հինրիխ Արենսի (Dr Geert-Hinrich Ahrens) հետ հանդիպման ժամանակ։
«Սերժ Սարգսյանն ընդգծել, որ ՀՀ կառավարությունն ու իր ղեկավարած Հայաստանի Հանրապետական կուսակցությունը պատրաստակամ են ըստ ամենայնի աջակցել առաքելությանը և մշտապես պատրաստ են հանդիպել, եթե դրա անհրաժեշտությունը հետագայում ևս կլինի», - «Նովոստի-Արմենիա» գործակալությանը տեղեկացրեցին ՀՀ կառավարության աշխատակազմի հասարակայնության հետ կապերի վարչությունից։
Կողմերը կարևորել են նաև նախորդ` 2007 թ.-ի մայիսին տեղի ունեցած խորհրդարանական ընտրությունների օրինակով, միջազգային չափանիշներին համապատասխան և վստահություն ներշնչող ընտրությունների անցկացման առումով ևս մեկ առաջընթաց քայլ կատարելը:
Հանդիպման ընթացքում դեսպան Գերտ-Հինրիխ Արենսը ՀՀ վարչապետին ներկայացրել է երկարաժամկետ և կարճաժամկետ դիտորդական առաքելությունների կողմից իրականացվելիք աշխատանքը, վստահեցրել, որ միջազգային հանրությունը ևս պատրաստ է աջակցել Հայաստանում ընտրությունների հաջող անցկացմանը և ուրախ կլինի ցանկալի առաջընթացը գրանցել:
Հայաստանի նախագահական ընտրությունները տեղի կունենան 2008 թ. փետրվարի 19-ին։-0-
