Մաքսային հավաքագրումների 2007թ. արդյունքների համաձայն նախատեսված 188,1 մլրդ դրամի փոխարեն կանխատեսվում է տարին ավարտել մոտ 209 մլրդ դրամ ցուցանիշով
ԵՐԵՎԱՆ, 19 դեկտեմբերի./Նովոստի-Արմենիա/. Մաքսային հավաքագրումների 2007թ. արդյունքները, համաձայն որոնց` նախատեսված 188,1 մլրդ դրամի փոխարեն դեկտեմբերի կեսի դրությամբ հավաքագրվել է 203 մլրդ դրամ, և կանխատեսվում է, որ տարին կավարտվի մոտ 209 մլրդ դրամ ցուցանիշով։
Այս մասին հայտնել է ՀՀ մաքսային պետական կոմիտեի նախագահ Արմեն Ավետիսյանը չորեքշաբթի ՀՀ նախագահ Ռոբերտ Քոչարյանի հետ կայացած աշխատանքային հանդիպման ժամանակ։
«Արմեն Ավետիսյանը նախագահին զեկուցել է, որ ի կատարումն նախագահի նախորդ հանձնարարականի, անցնող տարում շուրջ 4 մլրդ դրամ է ներդրվել մաքսային համակարգը տեխնիկական նորագույն միջոցներով ապահովելու գործում, և օրերս կավարտվի նաև վերջին` Բագրատաշենի մաքսակետի արդիականացման գործընթացը»,-ասված է հաղորդագրությունում:
Հանդիպման ժամանակ քննարկվել են մաքսային մարմինների աշխատանքի տարեկան հաշվետվությունը, մաքսազերծման գործընթացը միջազգային չափանիշներին համապատասխանեցնելու ուղղությամբ կատարվող աշխատանքները։
Անդրադարձ է կատարվել նաև 2008թ. անելիքներին, մասնավորապես` ստվերի առումով ռիսկային համարվող ոլորտների վրա մեծ ուշադրություն կենտրոնացնելու խնդրին:-0-
