Հայաստանի նախագահը գոհ է հայ-լիտվական երկխոսության ակտիվ զարգացումից
ՀՀ նախագահը գոհունակություն է հայտնել Հայաստանի և Լիտվայի միջև երկխոսության դինամիկ զարգացման վերաբերյալ։ Այս մասին Քոչարյանը հայտարարել է չորեքշաբթի՝ Լիտվայի ազգային պաշտպանության նախարար Յոզաս Օլեկասի հետ հանդիպման ժամանակ։
Ինչպես «Նովոստի-Արմենիա» գործակալությանը տեղեկացրեցին ՀՀ նախագահի մամուլի ծառայությունից, նախագահը բարձր է գնահատել պաշտպանության ոլորտում երկու երկրների գործակցության մակարդակը` նշելով, որ այն երկկողմ հարաբերությունների ամենազարգացած ուղղություններից է:
Հանդիպման քննարկման առանցքային թեման եղել է զինված ուժերում բարեփոխումների ուղղությամբ հայ-լիտվական համագործակցությունը: Զրուցակիցներն անդրադարձել են նաև Հայաստանի` եվրաինտեգրման գործընթացին:
Քոչարյանն ու Օլեկասը Հայաստան-ՆԱՏՕ Անհատական գործընկերության գործողությունների ծրագրի իրականացման գործընթացում Հայաստանի համար բավականին օգտակար ու կարևոր են համարել լիտվական փորձի փոխանցումն ու գործնական օժանդակությունը:-0-
