2008թ. ՀՀ արտաքին քաղաքական գերատեսչության ծախսերը կազմելու են 5,879 մլրդ. դրամ

ՀՀ արտաքին քաղաքական գերատեսչության  ծախսերը կազմելու են 5,879 մլրդ. դրամ։ Այս մասին հինգշաբթի, 2008թ. պետբյուջեի նախագիծը քննարկելիս, հայտարարեց ՀՀ ֆինանսների և էկոնոմիկայի առաջին փոխնախարար Պավել Սաֆարյանը։

Նրա խոսքով, նախարարություններին հատկացվելու է մոտ 850 մլն. դրամ, ինչը 96,2 մլն. դրամով ավելի է 2007թ. համեմատությամբ։

«Ծախսերի աճը պայմանավորված է աշխատավարձերի բարձրացումով, մասնավորապես, պետաշխատողների մեկնարկային աշխատավարձը 35,5 հազ. դրամից մինչև 40 հազ. դրամ, որոնցից են նաև ԱԳՆ աշխատակիցները»,- ասաց փոխնախարարը։

Սաֆարյանը նաև նշեց, որ վարչատեխնիկական անձնակազմի աշխատավարձը բարձրանալու է 12,7 տոկոսով, ինչպես նաև, ի տարբերություն մյուս կառույցների, ԱԳՆ-ում աշխատող դիվանագետների աշխատավարձն ավելանալու է 20 տոկոսով։

Նա պարզաբանեց, որ ԱԳՆ կառույցում աշխատում է 158 մարդ, որոնք ունեն դիվանագետի աստիճան, և նրանց միջին աշխատավարձը մյուս տարի կհասնի 199,8 հազ. դրամի՝ ընդդեմ 2007թ. 161 հազ. դրամի։

Սաֆարյանը տեղեկացրեց, որ 2008թ. դեսպանությունների և դիվանագիտական գերատեսչությունների ծախսերը  կազմելու են 4,6 մլրդ. դրամ, ինչը 302 մլն. դրամով ավելի է, քան 2007թ.։ «Բարձրացումը լիովին պայմանավորված է դիվանագետներին ապահովելու ամսեկան ծախսերի փոխհատուցումը 20 տոկոս ավելանալու հանգամանքի հետ և կազմելու է 233,2 մլն. դրամ»,- ասաց նա։

Փոխնախարարն ավելացրեց, որ ռազմական կցորդների և ՆԱՏՕ-ի ներկայացուցիչների ապահովման ծախսերը պահպանվելու են անցյալ տարվա մակարդակի վրա և կազմելու են 161,2 մլն. դրամ, իսկ արձանագրային բնույթի ծախսերը նախատեսվում են 134 մլն. դրամի չափով, ինչը 5,7 մլն. դրամով ավելի է, քան 2007թ.։--0—