ԱՄՆ կառավարությունը պատրաստ է տեխնիկական աջակցություն ցուցաբերել Հայաստանին` 2008թ. նախագահական ընտրությունների անցկացման համար

ԵՐԵՎԱՆ, 24 հոկտեմբերի./Նովոստի-Արմենիա/. ԱՄՆ կառավարությունը պատրաստ է տեխնիկական աջակցություն ցուցաբերել Հայաստանին` 2008թ. նախագահական ընտրությունների անցկացման համար։ Այս մասին հայտարարել է ԱՄՆ պետքարտուղար Կոնդոլիզա Ռայսը՝ նախօրեին վաշինգտոնում ՀՀ վարչապետ Սերժ Սարգսյանի հետ հանդիպման ժամանակ։

Ինչպես «Նովոստի-Արմենիա» գործակալությանը հայտնեցին ՀՀ կառավարության հասարակայնության հետ կապերի վարչությունից, հանդիպման ընթացքում արծարծվել է հարցերի լայն շրջանակ: Անդրադառնալով Հայաստանում իրականացվող ժողովրդավարական և տնտեսական բարեփոխումների ընթացքին` վարչապետ Սերժ Սարգսյանը ներկայացրել է ՀՀ իշխանությունների շարունակական ջանքերն այդ ուղղությամբ:

ՀՀ վարչապետը, մասնավորապես, նշել է, որ  խորհրդարանական  վերջին ընտրություններից հետո Հայաստանում լավ հիմքեր են ստեղծվել՝ շարունակելու ընտրական գործընթացների կատարելագործման նախաձեռնությունները:

Կողմերը քննարկել են ԼՂՀ հիմնախնդրի խաղաղ կարգավորման գործընթացի ներկա ընթացքը, արձանագրել են այդ գործընթացի հնարավորին արագացման կարևորությունը:

Այս առնչությամբ Սերժ Սարգսյանը նշել է, որ վերջին ժամանակներում Ադրբեջանի աճող ռազմատենչ  հայտարարություններն ամենևին էլ չեն նպաստում գործընթացին:

Քննարկման ընթացքում անդրադարձ է եղել նաև մյուս հարևանների հետ Հայաստանի հարաբերություններին, անվտանգության և էներգետիկ խնդիրներին, Հայաստանի մասնակցությանը միջազգային խաղաղապահ առաքելություններում և փոխադարձ հետաքրքրություն ներկայացնող այլ հարցերի:

Հայաստանի վարչապետ Սերժ Սարգսյանը հոկտեմբերի 17-23-ը ԱՄՆ-ում էր՝ պաշտոնական այցով։--0--