Հայաստան կժամանի Բունդեստագի պատվիրակությունը

ԵՐԵՎԱՆ, 16 հոկտեմբերի./Նովոստի-Արմենիա/. Հոկտեմբերի 17-ին Երևան կժամանեն Գերմանիայի Դաշնային Հանրապետության Բունդեստագի Գերմանիա-Հարավային Կովկաս պատգամավորական բարեկամության խմբի անդամները`  Շտե‎ֆեն Ռայխեի գլխավորությամբ, «Նովոստի-Արմենիային» տեղեկացրեցին ՀՀ ԱԺ հասարակայնության հետ կապերի վարչությունից:

Հոկտեմբերի 18-ին Բունդեստագի պատվիրակությունը կհանդիպի ՀՀ ԱԺ նախագահ Տիգրան Թորոսյանի հետ, ինչպես նաև ԱԺ եվրաինտեգրման հարցերի մշտական հանձնաժողովի, ՀՀԿ, «Բարգավաճ Հայաստան», ՀՅԴ, «Ժառանգություն», «Օրինաց երկիր» խմբակցությունների անդամների հետ:

Նույն օրը նախատեսված են հանդիպումներ ՀՀ-ում հավատարմագրված Եվրամիության անդամ երկրների դեսպանների, ՀՀ արտաքին գործերի փոխնախարար  Արմեն Բայբուրդյանի հետ:

Հոկտեմբերի 19-ին Բունդեստագի ներկայացուցիչները կայցելեն Մայր Աթոռ Սուրբ Էջմիածին, ինչպես նաև կհանդիպեն ՀՀ ‎ֆինանսների ու էկոնոմիկայի նախարար Վարդան Խաչատրյանի և Հայաստանում գործող գերմանական կազմակերպությունների հետ: --0—