Հայաստանի ապագան առաջին հերթին կախված է ղարաբաղյան հարցի կարգավորումից. ՀՀ նախկին նախագահ
ԵՐԵՎԱՆ, 24 սեպտեմբերի. /Նովոստի-Արմենիա/. Այսօր հայ ժողովրդի, Հայաստանի առջև կանգնած գերագույն խնդիրը, որից կախված է Հայաստանի ապագան, մեր ժողովրդի բարօրությունը և մեր տնտեսության բարգավաճումը, ԼՂՀ հարցի կարգավորումն է:
Այս մասին ուրբաթ Երևանում հայտարարեց Հայաստանի նախկնի նախագահ Լևոն Տեր-Պետրոսյանը՝ ՀՀՇ կուսակցության կազմակերպած ՀՀ Անկախության օրվան նվիրված տոնակատարության ժամանակ։
«Եթե չլինի այդ գիտակցությունը, Հայաստանը կվերածվի երրորդ աշխարհի մի երկրի, որի միակ կապիտալը լինելու է աշխատանքի արտահանումը»,-ասել է նա:
Այդ առիթով Տեր-Պետրոսյանը նշել է, որ ԼՂՀ հարցի կարգավորումն այս 10 տարիների ընթացքում «համարյա թե հասել է անհուսալի վիճակի»:
Տեր-Պետրոսյանը կարծում է, որ այսօրվա դրությամբ Հայաստանի ամենամեծ ռեսուրսը նրա բացվածությունն է աշխարհի առջև։
«Եթե այսպես փակված մնանք, մենք կկորցնենք ոչ միայն Ղարաբաղը, այլ նաև պետք է մտածենք Հայաստանի տարածքային ամբողջականության պահպանման մասին»,-ընդգծել է Լևոն Տեր-Պետրոսյանը:
Այս առթիվ նախկին նախագահը անհրաժեշտ և հնարավոր է համարում «Հայաստանում վերականգնել օրենքի իշխանությունը, կոռուպցիոն կառույցը լիովին կազմաքանդելը և վերականգնել դեմոկրատական ազատությունները»։
1991թ. սեպտեմբերին Հայաստանի Հանրապետության պատմության մեջ նախագահական առաջին ընտրությունների ժամանակ հաղթեց Հայոց համազգային շարժում կուսակցության կողմից առաջադրված թեկնածու Լևոն Տեր-Պետրոսյանը։
Հինգ տարի անց՝ 1996թ. սեպտեմբերյան ընտրություններում Լ. Տեր-Պետրոսյանը պահպանեց նախագահի աթոռը, թեև ընդդիմությունը և մի շարք միջազգային հեղինակավոր կազմակերպություններ ընտրությունների արդյունքները կեղծված համարեցին։
1998թ. փետրվարին Տեր-Պետրոսյանը, իշխանական վերնախավում ղարաբաղյան հիմնահարցի լուծման վերաբերյալ առաջացած տարաձայնությունների պատճառով, հայտարարեց իր լիազորությունների վաղաժամ դադարեցման մասին և հրաժարական տվեց։--0--
