Մեխիկոյում անցկացվող շախմատի աշխարհի առաջնության վեցերորդ փուլում Արոնյան-Կրամնիկ հանդիպումն ավարտվեց ոչ-ոքի

Մեքսիկայի մայրաքաղաքում անցկացվող շախմատի աշխարհի առաջնության վեցերորդ փուլում Հայաստանի շախմատիստ Լևոն Արոնյանը ոչ-ոքի է խաղացել աշխարհի գործող բացարձակ չեմպիոն ռուս Վլադիմիր Կրամնիկի հետ։

Ինչպես չորեքշաբթի «Նովոստի-Արմենիա» գործակալությանը տեղեկացրեցին Հայաստանի շախմատի ֆեդերացիայից, նման արդյունք է գրանցվել նաև Ալեքսանդր Գրիշչուկ (Ռուսաստան)-Պյոտր Սվիդլեր (Ռուսաստան) և Պետեր Լեկո (Հունգարիա)-Վիշվանաթան Անանդ (Հնդկաստան) հանդիպումների ժամանակ։

Վեցերորդ փուլի միակ արդյունավետ հանդիպումը եղել է Բորիս Գելֆանդ (Իսրայել)-Ալեքսանդր Մորոզևիչ (Ռուսաստան) խաղը, որն ավարտվել է իսրայելցի շախմատիստի հաղթանակով։

Մրցութային վեց օրերի ընթացքում 4-ական միավորով առաջնության աղյուսակը գլխավորում են Անանդն ու Գելֆանդը, նրանց 3,5-ական միավորով հետևում են  Կրամնիկն ու Գրիշչուկը։

Արոնյանը և Լեկոն ունեն 2,5-ական միավոր, իսկ Սվիդլերը և Մորոզևիչը՝ 2-ական։

Առաջնության առաջին շրջանի ավարտն ազդարարող յոթերորդ փուլում կհանդիպեն Սվիդլերը և Արոնյանը, Կրամնիկն ու Գելֆանդը, Մորոզևիչը և Լեկոն,  Անանդը և Գրիշչուկը։

Շախմատի աշխարհի առաջնությունն անցկացվում է Մեքսիկայի մայրաքաղաքում՝ երկու փուլով։ Խաղերի օրերն են՝ սեպտեմբերի 13-16-ը, 18-21-ը, 23-25-ը և 27-29-ը։ Անհրաժեշտության դեպքում սեպտեմբերի 30-ին կանցկացվի թայ-բրեյք։ 

Առաջնության կազմկոմիտեն գլխավորում է Խորխե Սագիանտեն, մրցանակային ֆոնդը 1,3 ԱՄՆ դոլար է։-0-