Հայաստանում հայտարարված է «Լավագույն համայնք 2007» մրցույթը
ԵՐԵՎԱՆ, 29 օգոստոսի./Նովոստի-Արմենիա/. Հայաստանի համայնքների ասոցիացիան և Տարածքային կառավարման նախարարությունը հայտարարել են «Լավագույն համայնք 2007» մրցույթի մեկնարկի մասին։
Ինչպես չորեքշաբթի «Նովոստի-Արմենիա» գործակալությանը տեղեկացրեցին Ասոցիացիայի մամուլի ծառայությունից, մրցույթի շրջանակներում կընտրվեն Հայաստանի լավագույն գյուղական, քաղաքային և մարզային համայնքները։
Մրցույթին մասնակության թեկնածությունները կարող են առաջադրվել պետական կառույցների, պաշտոնական անձանց, հասարակական կազմակերպությունների կողմից։ Գործելու է նաև ինքնառաջադրումը։
Ինչպես տեղեկացվում է մամուլի հաղորդագրության մեջ, մրցույթին մասնակցելու ցանկություն ունեցողները պետք է մինչև 2007թ. հոկտեմբերի 5-ը լրացնեն և փակ ծրարով Ասոցիացիայի գրասենյակ ներկայացնեն հայտը։
Հայտերը կգնահատվեն և հաղթողները կորոշվեն Համայնքների ասոցիացիայի վարչության անդամների (եթե նրանք չեն մասնակցում մրցույթին) և Տարածքային կառավարման նախարարության ներկայացուցիչների հանձնաժողովի կողմից։
Արդեն երրորդ անգամ անցկացվող մրցույթի հաղթողների մրցանակաբաշխությունը տեղի կունենա 2007թ. նոյեմբերին։--0—
