Սփյուռքը պետք է վստահելի կամուրջ դառնա Հայաստանի գլոբալիզացիոն գործընթացների գործում
Սփյուռքը պետք է վստահելի և արդյունավետ կամուրջ դառնա, որով Հայաստանը պիտի ներգրավվի համաշխարհային գլոբալիզացիոն գործընթացների մեջ։ Այս մասին երկուշաբթի Երևանում հայտարարեց Հայաստանի ԱԺ գիտության, կրթության, մշակույթի և երիտասարդության հարցերի մշտական հանձնաժողովի նախագահ Հրանուշ Հակոբյանը։
«Անհրաժեշտ է սփյուռքը ներգրավել երկրի ներքին գործընթացներում, ինչպես նաև Հայաստանի և այլ երկրների միջազգային կառույցների միջև համագործակցության գործուն մեխանիզմներ մշակելու գործում»։
Հակոբյանի խոսքերով Հայաստանի և սփյուռքի միջև առկա է բազմակողմանի և խորացված համագործակցություն, որի հետագա զարգացման գործում քիչ դեր չունի երիտասարդ սերունդը։
Այդ իմաստով պատգամավորը կարևորեց տարբեր մակարդակների վրա հայագիտության խորացումը։
«Ես կարծում եմ, որ Հայաստանում անհրաժեշտ է ստեղծել հայագիտության խոշոր կենտրոն՝ սփյուռքի մասնաճյուղերով»,- պարզաբանել է նա։
Ի շարս սփյուռքահայության առջև ծառացած այլ խնդիրների, Հակոբյանը առանձնացրեց կրթության, դասագրքերի ստեղծման, հայրենիքում արդի մասնագիտություններով դասախոսների պատրաստման հետ կապված խնդիրները։
Պատգամավորը կարծում է նաև, որ հայերը պետք է օգտագործեն ժամանակակից տեղեկատվական տեխնոլոգիաները և համատեղ ջանքերով, CNN-ի նմանությամբ, ստեղծեն համազգային հեռուստաալիք։
«Բացի այդ, Հայաստանի հանրային հեռուստաընկերությունը պետք է մատչելի լինի երկրից դուրս գտնվող բոլոր հայ ընտանիքների համար»,- նշեց նա։
Նրա խոսքերով, Հայաստանում պետք է ստեղծել շահավետ բիզնեսի համար անհրաժեշտ պայմաններ։ Ընդ որում, բարեգործական ծրագրերից ժամանակն է անցնել զարգացման ծրագրերին։
«Աշխարհասփյուռ հայության երիտասարդ սերունդը, հարգելով հանդերձ այն երկրները, որտեղ բնակվում է, պետք է հարգի և սիրի նաև իր հայրենիքը, ազգությունը, պատմությունը, լեզուն և օգտագործի իր գիտելիքներն ու հնարավորությունները նախևառաջ ի նպաստ իր հայրենիքի՝ Հայաստանի»,- հավելել է Հակոբյանը։
Ըստ որոշ տվյալների, սփյուռքի ընդհանուր թիվը կազմում է շուրջ 10 մլն։
Երևանում 2007թ. հուլիսի 9-11-ը անցկացվող միջազգային խորհրդաժողովը կազմակերպված է Համաշխարհային հայկական կոնգրեսի կողմից (ՀՀԿ)՝ վերջինիս երիտասարդական կազմակերպությունների նախաձեռնությամբ։ Միջոցառմանը մասնակցում է 300 ներկայացուցիչ 25 երկրներից, այդ թվում՝ Ղարաբաղից, Ռուսաստանից, Վրաստանից, Բելառուսից, Ուկրաինայից, Ուզբեկիստանից, Էստոնիայից, Բրազիլիայից, Թուրքիայից, Ռումիանիայից, Իրանից, Իրաքից, Սիրիայից, Քուվեյթից, Հորդանանից, Ֆրանսիայից, Հոլանդիայից և ԱՄՆ-ից։-0-
