Ադրբեջանի ԱԳՆ-ն Ֆրանսիայի դեսպանին Ղարաբաղի վերաբերյալ Սենատի որոշման հետ կապված բողոքի նոտա է փոխանցել

ԵՐԵՎԱՆ, 26 նոյեմբերի․ /Նովոստի-Արմենիա/․ Բաքվում Ֆրանսիայի դեսպան Զաքարի Գրոսը կանչվել է Ադրբեջանի ԱԳՆ՝ Ֆրանսիայի Սենատի կողմից Ղարաբաղի վերաբերյալ ընդունված բանաձևի պատճառով, հինգշաբթի հաղորդել է հանրապետության արտաքին գործերի նախարարության մամուլի ծառայությունը, հաղորդում է ՏԱՍՍ- ը :

«Դեսպանին փոխանցվել է Ադրբեջանի ԱԳՆ-ի բողոքի նոտան` կապված Ֆրանսիայի Սենատի կողմից «Լեռնային Ղարաբաղի Հանրապետությունը ճանաչելու անհրաժեշտության մասին» բանաձևի ընդունման հետ:

Նախարարությունը նշել է, որ դեսպանը խոստացել է պաշտոնական Բաքվի դիրքորոշումը փոխանցել Ֆրանսիայի իշխանություններին:

Նոյեմբերի 25-ին Ֆրանսիայի Սենատը ձայների ճնշող մեծամասնությամբ ընդունեց Լեռնային Ղարաբաղի (Արցախի) անկախությունը ճանաչող բանաձև: Փաստաթուղթը, մասնավորապես, դատապարտում է սեպտեմբերի 27-ին ադրբեջանա-թուրքական ահաբեկչական վարձկանների մասնակցությամբ Արցախի դեմ սանձազերծված ռազմական ագրեսիան և կոչ է անում Ֆրանսիայի իշխանություններին ձեռնարկել բոլոր հնարավոր միջոցները` ապահովելու 1994-ին հաստատված Լեռնային Ղարաբաղի սահմանների վերականգնումը:

Սենատի (Ֆրանսիայի խորհրդարանի վերին պալատ) բանաձևերը խորհրդատվական բնույթ են կրում, դրանք գործադիր իշխանությունը կարող է հաշվի առնել, բայց պարտավոր չէ կատարել: -0-