ԵՐԵՎԱՆ, 16 փետրվարի./Նովոստի-Արմենիա/. ՀՀ արտգործնախարար Արարատ Միրզոյանն այսօր կառավարության նիստի ժամանակ անդրադարձավ նախօրեին Թուրքիա կատարած այցին:
Նա նշեց, որ քննարկվել են երկկողմ հարաբերությունների որոշ հարցեր, ձեռք են բերվել կոնկրետ պայմանավորվածություններ:
«Որոշում կա արագացնել երկխոսության գործընթացը և վերջնական սահմանների բացման նպատակով տեղի ունեցող գործընթացները: Հայտարարվեց, որ համատեղ աշխատանքներ կիրականացնենք Անիի պատմական կամրջի վերականգնման ուղղությամբ: Ըստ էության՝ մինչև զբոսաշրջային սեզոնի մեկնարկը նաև կաշխատենք ավարտին հասցնել երրորդ երկրների քաղաքացիների համար և մեր երկու երկրների դիվանագիտական անձնագրեր ունեցող քաղաքացիների համար ցամաքային սահմանի հատումը»,- ասաց Միրզոյանը:
ՀՀ վարչապետ Նիկոլ Փաշինյանն իր հերթին նշեց, որ կառավարության գործունեության ծրագրում ընդգծվել է տարածաշրջանում հարաբերությունների որակը փոխելու Հայաստանի տեսլականը:
«Խոսեցիք
Անիի կամրջի մասին, մենք էսքիզային նախագիծ բավական երկար ժամանակ առաջ պատրաստել ենք: Դա կարող է շատ սիմվոլիկ քայլ դառնալ», - ասաց Փաշինյանը:-0-
